Халăх дружинисем обществăри йĕркелĕхе тивĕçтерессине яланах пысăк тÿпе хывнă. Юлашки çулсенче вара ку юхăм пушшех çĕнĕ вăй илнине куратпăр.

Районта, акă, полици ĕçченĕсемпе пĕрле дружинниксем хуралта тăмасăр пĕр йышлă мероприяти те иртмест. Çавăн пекех автоинспекторсене çул-йĕр тĕрĕслевĕнче те пулăшаççĕ вĕсем. Вĕренÿ учрежденийĕсенче ачасемпе тăтăш тĕл пулаççĕ% саккунсене пăсасран асăрхаттарма тăрăшаççĕ, сиенлĕ йăласенчен тата тĕрлĕ хăрушлăхран хÿтĕленме хăнăхтараççĕ тата ытти те.

Тивĕçĕсем, чăнах та, тĕрлĕ енлĕ, пĕлтерĕшлĕ. Ĕçĕн пысăк пайĕ обществăлла майпа пурнăçланать. Çавăнпа та вĕсене хавхалантарни хаклă. Çакнашкал хавхалантару мелĕсенчен пĕри – районти «Чи лайăх халăх дружинникĕ» конкурс. Унта, йăлана кĕнĕ тăрăх, чи маттуррисене, саккунсене чи аван пĕлекенсене, тĕслĕх кăтартакансене палăртаççĕ.

Нумаях пулмасть кăçалхи ăмăртăвăн кăтартăвĕсене пĕтĕмлетнĕ. Каламалла, чи лайăххин ятне илессишĕн хастар виçĕ дружинник тупăшнă% Галина Павлова, Анатолий Степанов, Алексей Фирсов. Конкурс икĕ тапхăрпа иртнĕ. Пĕрремĕшĕнче, сăмахран, участниксен пĕлтĕрхи ĕç-хĕлне хакланă. Çав шутра – обществăлла тивĕçсене пурнăçлама уйăрнă вăхăта, преступленисене уçса пама хутшăннине, административлă йĕркене пăснă тĕслĕхсене палăртнине.

Иккĕмĕш тапхăр та çăмăл мар – тестировани. Конкурсантсем ун витĕр те ăнăçлă тухнă – федераллă тата республика шайĕнчи саккунсене, Административлă правăна пăсни çинчен калакан кодекса тĕплĕ шĕкĕлченине кăтартнă.

Апла пулин те çĕнтерÿçĕ пĕрре. Пуринчен нумай балл пухаканĕ Галина Павлова пулса тăнă. Сатур спортсмен, пултаруллă вĕрентекен халăх дружининче те хастаррине çирĕплетнĕ.

Чи лайăх дружинник ятне тивĕçнипе саламласа ăна район администрацийĕн пуçлăхĕ Андрей Тихонов депутатсен район Пухăвĕн ларăвĕнче чысланă.

Вăл район чысне хÿтĕлесе республикăри тĕп ăмăртура та палăрасса иккĕленместпĕр.

Ирина ЯКОВЛЕВА.