Юнкун районти мĕнпур шкулта Пĕрремĕш шăнкăрав уявĕсем иртрĕç. Çĕнĕ вĕренÿ çулĕнче пĕлÿ тĕнчине 3376 вĕренекен çул тытрĕ. Вăл йышран 366 ача пĕрремĕш хут парттăсем хушшине ларчĕ.

Шкул ачисене, вĕрентекенсене, ашшĕ-амăшне яваплă та пĕлтерĕшлĕ тапхăрпа вырăнти хăйтытăмлăх органĕсен представителĕсем кашни шкула çитсе саламланă. Район администрацийĕн пуçлăхĕ Андрей Тихонов Вăрнарти 2-мĕш шкулти савăнăçлă линейкăна хутшăнчĕ. Сăмах май, кĕçĕн классене вăл хăй те ку шкулта пĕтернĕ. Андрей Владимирович ачасене пур енлĕн аталанма ăнтăлу, ăнăçу сунчĕ.

Ку шкулта пуçласа пĕлÿ тĕнчине ыткăнакансем – 125 ача. Вĕсем пултаруллă та мал опытлă вĕрентекенсем пулăшнипе ăс-хакăл вăрттăнлăхĕсене хываççĕ.

2-мĕш шкул кăçалтан «Шкула – футбол» программăна пурнăçлама тытăнать. Çавна май физкультура урокĕсем спортăн ку тĕсĕн элеменчĕсене усă курса иртĕç. Шкул директорĕ Сергей Ильин ку хыпара «Химик-Август» команда вĕрентÿ учрежденине футбол мечĕкĕсем парнеленĕ самантра пĕлтерчĕ.

Пухăннисене Пĕлÿ кунĕпе çавăн пекех республикăри регбол федерацийĕн президенчĕ Роман Алексеев та саламларĕ.

Светлана ЧИКМЯКОВА.