Чăваш ен Министрсен Кабинечĕн председателĕн заместителĕ – вĕрентÿпе çамрăксен политикин министрĕ Алла Салаева, Вăрнарта педагогсен августри канашлăвне хутшăннă май, паянхи ăрăвăн пĕлÿ тĕнчинче пысăкран та пысăк çитĕнÿсем тума май пуррине палăртрĕ.

Малтанах вăл район администрацийĕн пуçлăхĕпе Андрей Тихоновпа, «Август» Фирмăн «Вăрнарти хутăш препаратсен завочĕ» филиалĕн директорĕпе Владимир Свешниковпа, республикăри регбол федерацийĕн президенчĕпе Роман Алексеевпа пĕрле поселокри 2-мĕш шкулăн «/сĕм точки» центрĕн тата IT-Куб воспитанникĕсен çитĕнĕвĕсемпе паллашрĕ. Ачасем пысăк пуçлăхсене робототехника, программировани, халăх творчестви енĕпе хăйсем пурнăçланă ĕçсене хаваспах кăтартрĕç. «Маттурсем!» – ырларĕ Алла Леонидовна, ÿлĕмрен наукăри çĕнĕ ятсем хушшинче вĕсене те курма ăнăçу суннă май.

Педагогика йышĕпе вăл калаçăва паянхи вĕрентÿ тытăмĕн аталанăвĕ тавра йĕркелерĕ. Çывăх çулсенче шкулсемпе ача сачĕсем палăрмаллах çĕнелмеллине палăртрĕ, коллективсене юсав программисене хастартарах хутшăнма ыйтрĕ. Кăçал, акă, Чăваш енри 90 вĕрентÿ учрежденийĕ çĕнелнĕ, ку тĕллевпе 2 млрд ытла тенкĕ уйăрнă. Пирĕн районта Пăртас шкулĕнче пысăк юсав иртрĕ.

Алла Салаева çитес çултан çĕршывра шкулсене тĕпрен юсассипе федераллă программа ĕçлесе каяссине пĕлтерчĕ. Вăтам пĕлÿ тытăмĕн учрежденийĕсен çĕнетĕвне оборудованипе пур енлĕн, туллин тивĕçтересси те кĕрĕ.

– Условисем йĕркеленеççĕ, вĕрентÿ пахалăхне те тимлĕх уйăрмалла, – терĕ вăл, вĕрентÿ организацийĕсен миссийĕ ачара творчество çулăмне чĕртесси, аталанма майсем туса парасси пулнине палăртса.

Вице-премьер хăшпĕр уроксенчи темăсене экскурси мелĕпе аталантарма май пуррине те асăнчĕ. «Республикăра паллă вырăнсем чылай. Граждан вăрçине вĕренетĕн – Чапаев музейне çул тыт. Космос пирки-и тема? Шуршăлти музей йыхравлать... Ку – вĕрентÿ çине çĕнĕлле пăхни», – терĕ вăл.

Алла Салаева коллективсене пĕршухăшлăха мала хума ыйтрĕ.

Район администрацийĕн пуçлăхĕн Андрей Тихоновăн, Вăрнарти хутăш препаратсен завочĕн директорĕн Владимир Свешниковăн, регбол федерацийĕн президенчĕн Роман Алексеевăн сăмахĕсем те пĕлĕве çĕклес, воспитани ыйтăвĕсене ытларах тимлĕх уйăрас тĕллевсемпе çыхăнчĕç.

«Кашни ача валли – пурнăçа путевка» – çак ятпа иртрĕ кăçалхи августри канашлу. Район администрацийĕн пуçлăхĕн çумĕ–вĕрентÿ пайĕн пуçлăхĕ Денис Трофимов иртнĕ вĕренÿ çулĕн пĕтĕмлетĕвĕсемпе тата малашлăх тĕллевĕсемпе паллаштарнă май, ырă самантсемпе пĕрлех çитменлĕхсене те çĕклерĕ. Шкулсем юсавра çĕнелеççĕ, вĕсенче тĕрлĕ енлĕ аталану проекчĕсем пурнăçа кĕреççĕ, хавхалантару мелĕсем ĕçлеççĕ... Çав вăхăтрах Денис Юрьевич хăйне шухăшлаттаракан ыйтусене те хускатрĕ. Тĕпрен илсен, ЕГЭ тата ГИА кăтартăвĕсем тĕлĕшпе. Уйрăмах 9-мĕш класс хыççăнхи тĕп экзаменсенчи балсем шухăша яраççĕ – кирлĕ минимум чухлĕ çырайманнисем чылаййăн.

Денис Трофимов çавăн пекех шкулсенче пĕлÿ пахалăхне хаклассине тивĕçлĕ йĕркелемеллине те каларĕ. Çакна вăл медалистсен йышĕнчен хăшĕсен суйласа илнĕ предметсемпе ЕГЭ кăтартăвĕсем 70 балран сахалтарах пулнипе çыхăнтарчĕ.

Вĕрентÿ пайĕн пуçлăхĕ педагогика йышне паянхи кун хумĕпе аталанса пыма, тытăмра çирĕплетнĕ проектсемпе программăсене анлăрах алла илме ăнăçу сунчĕ.

Вăрнарти 2-мĕш вăтам шкулта икĕ çул ытла ĕнтĕ «/сĕм точки» центр ĕçлет. Вăл ачасене гуманитари тата цифра профилĕсемпе аталанма май парать. Вĕренекенсемшĕн мĕнпе лайăх-ха – кун пирки Сергей Ильин директор каласа кăтартрĕ.

Яланхиллех мал опытлă вĕрентекенсен пысăк йышĕ тĕрлĕ шайри наградăсене тивĕçрĕ.

Чăваш ен Вĕрентÿпе çамрăксен политикин министерствин Хисеп грамотисене Вăрнарти 1-мĕш шкулти кĕçĕн классен учителĕ Нина Васильевна Бурмистрова, «Ромашка» ача сачĕн воспитателĕ Надежда Павловна Малова, ача-пăча ÿнер шкулĕн преподавателĕ Елена Николаевна Есенцева, Вăрнарти 2-мĕш шкулти вырăс чĕлхи учителĕ Надежда Николаевна Леонтьева, Вăрманкас шкулĕнчи истори учителĕ Алена Николаевна Петрова тивĕçрĕç.

Район администрацийĕн Тавне илнисем% Надежда Геннадьевна Никитина – «Сеспель» ача сачĕн заведующийĕ, Венера Васильевна Андреева, Надежда Викторовна Бурмистрова, Татьяна Витальевна Григорьева – Аçăмçырминчи, Вăрнарти 2-мĕш тата 1-мĕш шкулсенчи кĕçĕн классен учителĕсем, Роман Юрьевич Львов – «Рассвет» ФСК тренерĕ.

Вĕрентÿ ĕçченĕсен Профсоюзĕн Чăваш рескомĕн Хисеп грамотипе Калинино шкулĕн кĕçĕн классен учительне Марина Валентиновна Матвеевана, Ярмушка шкулĕнчи вырăс чĕлхи учительне Марина Николаевна Перепелкинана, Вăрман Кипек шкул директорĕн заместительне Алина Николаевна Андреевана, «Солнышко» ача сачĕн аслă воспитательне Алина Ивановна Волкована наградăларĕç.

Çавăн пекех ĕçре уйрăмах палăрнă педагогсем ытти шайри наградăсене те илчĕç.

Хыççăн Алла Салаева вице-премьер районти культура çурчĕ çумĕнчи парка çитсе курчĕ, кунта «Хăтлă хула хутлăхĕ» программăпа пыракан ĕçсемпе паллашрĕ.

Вице-премьерăн Вăрнар районĕнчи визичĕ «Август» Фирмăн «Вăрнарти хутăш препаратсен завочĕ» филиалĕнче пулнипе вĕçленчĕ. Вăл предприяти цехĕсемпе, лаборатори ĕçĕ-хĕлĕпе паллашнă, завод ĕçченĕсемпе тĕл пулнă.

Светлана ЧИКМЯКОВА.