Кăшлакан шăши евĕрлĕ чĕрчунсем ял хуçалăх культурисен тата продукцийĕн чăн-чăн сăтăрçисем. Вĕсем çулталăк тăршшĕпех сиен кÿреççĕ. Чи анлă сарăлнă сăтăрçăсем – уй-хир шăшийĕсем.

Вĕсем кĕркунне акнă тырăсен анисене, çавăн пекех нумай çул ÿсекен курăксене, кĕтÿ çÿретмелли вырăнсене тапăнаççĕ. Авăн уйăхĕнчи кăтартусем тăрăх, кăшлакан шăши евĕрлĕ чĕрчунсен йышĕ пĕлтĕрхипе танлаштарсан, акă, икĕ хут ытла пысăкланнă. Вĕсем малалла та ĕрчесех пырĕç. Кĕркунне уйрăмах пысăк сиен кÿреççĕ. Кĕр тыррисен уйĕсенче 1 гектар çине 50–100-шер, нумай çул ÿсекен курăксен лаптăкĕсенче 100–150-шар шăши йăви тупса палăртни те пулать. Специалистсем çирĕплетнĕ тăрăх, кăшлакан чĕрчунсем сухаламасăр акакан уйсенче йышлăрах. «Санары» агрофирма нульлĕ технологипе усă курать, çавăнпа та хуçалăхра сăтăрçăсемпе кĕрешесси пысăк тимлĕхре. Хуçалăхра, акă, ятарлă бригада шăши шăтăкĕсем тĕлне хими препарачĕ сапнă илĕртмĕш (бродифакум) хурса тухас тĕлĕшпе тĕллевлĕ ĕçлет.

Пулас тухăçшăн тăрăшни ыр çимĕç парать. Агрофирмăра кăçал та кĕр тыррисем ăнса çитĕннĕ, гектартан вăтамран 41 центнер тухнă.

Вячеслав АЛЕКСЕЕВ,

Раççей ял хуçалăх центрĕн районти уйрăмĕн пуçлăхĕ.