Вăрнарти хутăш препаратсен завочĕ кăларакан продукцин мĕнпур калăпăшĕн 15 проценчĕ – пĕчĕк фасовкăллă препаратсем. Вĕсем уйрăм хушма хуçалăхсенче, дача тата сад участокĕсенче усă курма меллĕ.

Продукцин тĕп пайĕ вара ял хуçалăх предприятийĕсемпе агрохолдингсене ăсанать. Çавăнпа та вĕсене пысăк тарăсене виçсе тултараççĕ% 10 л таран кĕрекен канистрăсене, хутаçсене, банкăсене. Кăçалхи 8 уйăхра, сăмахран, завод пестицидсене пысăк фасовкăпа 9,7 пин тонна енне туса кăларнă, пĕчĕк тарăсенчи препаратсене – 1,8 пин тонна майлă. Палăртмалла, 2015–2020 çулсенче пахчаçăсем валли хатĕрленисен калăпăшĕ 71 процент ÿснĕ.

Уйрăм хушма хуçалăхсемпе дача-сад участокĕсенче усă курмалли продукци ассортименчĕ паян кирек кама та тивĕçтерме пултарать. Вăл шутра – çумкурăкпа, ÿсентăран чирĕсемпе тата хурт-кăпшанкăпа кĕрешмелли 68 препарат. «Август» компани биопрепаратсем кăларассине те пысăк тимлĕх уйăрать, вĕсен тĕсĕсем çулсерен анлăланса пыраççĕ. Октябрьте, акă, сиенлĕ хурт-кăпшанкăсемпе, çав шутра ÿсентăран сăвăсĕсемпе те, кĕрешекен тепĕр çĕнĕ биопрепарат производствине ĕçе кĕртесшĕн.

Дача хуçисемпе пахчаçăсем валли препаратсем хатĕрлесе фасовкăлассипе заводра уйрăм цех ĕçлет. Унта производствăпа фасовкăн 13 линине вырнаçтарнă, хăватлăхĕ – çулталăкра 3,5 пин тонна таран. Цехра унсăр пуçне сад кăткисене, каюрасене тата ытти сăтăрçăсене пĕтерекен гранулăллă препаратсене кăларассине те йĕркелесе янă. Продукцие тултаракан савăтсем те, тĕпрен илсен, заводăн харпăр хăйĕнех – ятарлă цехра пысăк канистрăсемпе пĕрлех 15, 50, 100 мл виçеллĕ флаконсене те ăсталаççĕ.

Цехри оборудовани пĕрмаях çĕнелсе пырать. Микрогранулăллă препаратсене фасовкăлакан автомат туяннă. 250, 500 мл тата 1 л кĕрекен савăтсене ярса тухмалли карусель евĕр автомата вырнаçтарасшăн. Оборудовани хамăр çĕршыврах туяннăскер, хакĕ – 8 млн тенкĕ ытла.

Уйрăм хушма хуçалăх препарачĕсен цехĕнче 92 çын тăрăшать. Вĕсен умне лартнă тĕллевсем пысăк% коллектив эрнере 6 кун 3-шер сменăпа пĕр чарăнмасăр вăй хурать.

Тавар ăсатнинчен куратпăр% пахчаçăсемпе дача хуçисем çумкурăка, фитофтороза, колорадо нăррине, купăста лĕпĕшне, ытти сăтăрçăсене тĕп тăвакан препаратсене тата удобренисене ытларах ыйтаççĕ.

Ку ушкăнри продукцие кăларассине завод малашлăхлă тесе шутлать: «Август» компанин инвестици планне тепĕр çакăн пек цех строительствине кĕртнĕ.

Людмила ИВАНОВА хатĕрленĕ.