Юлашки эрнере коронавирус инфекцийĕпе чирленисен йышĕ чакни статистика кăтартăвĕсенчен паллă. Анчах та малалла лару-тăру епле пулассине пĕлме çук. Çавăнпа та хăрушă чиртен сыхланмалли мерăсене пăхăнмалла.

Коронавирусран прививка тутарни чирпе тухăçлă кĕрешме пулăшать. Хăшпĕрисене поликлиникăна çитме йывăртарах, çавăнпа та район тĕп больницинче тăрăшакан медсестрасемпе тухтăрсен бригадисем яллă тăрăхсене тăтăшах тухса çÿреççĕ. Раштав уйăхĕн 6-мĕшĕнчи кăтарту çакна çирĕплетет – пĕрремĕш компонентпа районти 10235 çынна вакцинациленĕ. Ку вăл планăн 56,6 проценчĕ. Тĕнчере те, Раççейре те коронавируса пула пурнăçран уйрăлакансем сахал мар. Çавăнпа та прививка туни ĕмĕре тăсма пулăшать тесе çирĕплетеççĕ тухтăрсем.

Районта профилактика мерисене епле пăхăннине те тĕрĕслеççĕ. Акă, мобильлĕ ушкăнсем кашни кунах ĕçлĕ çÿревре пулаççĕ. «Суту-илÿ лавккисене QR-кодсăр кĕртмеççĕ, прививка тутармаллах», – терĕ хаçат тусĕсенчен пĕри.

Вакцинациленни ытти чир-чĕртен те хÿтĕленме пулăшать. Çамрăк ăру сывлăхĕшĕн тăрăшни те питех пĕлтерĕшлĕ. Вăрнар районĕнче грипп вирусĕнчен 4130 ачана прививка тунă е плана 100 процент пурнăçланă. Калас пулать, 4130 доза вакцинăран 3010-шĕ – «Совигрипп», 1120-шĕ – «Ультрикс квадри».

Елена ПОРФИРЬЕВА.