Çĕнĕ çул – çемье праçникĕ. Унăн тĕп символĕ – хÿхĕм симĕс чăрăш. Кашниех унпа хăйĕн кил-çуртне илемлетме тăрăшать.

Çавăнпах ĕнтĕ çывхарса килекен уявсем умĕн вăрман хуçалăхĕн сотрудникĕсен те ĕç нумай. Шел те, Çĕнĕ çул çитеспе лăсăллă çамрăк йывăçсене саккунсăр каснă тĕслĕхсем ÿснине курма пулать.

Çакнашкал киревсĕр ĕçсене асăрхаттарас тесе декабрĕн 20-мĕшĕнчен вăрмансене патрульсене тухма, чăрăш пасарĕсенче рейдсем ирттерме, çынсене йывăçсене хăйсем тĕллĕн касма юраманнине тата вăрман саккунлăхне пăснăшăн тивекен яваплăх çинчен ăнлантарма тытăннă.

Асăрхаттаратпăр: саккунсăр майпа каснă пĕр чăрăшшăн граждансене 3–4 пин тенкĕ штраф кĕтет, должноçри çынсене – 20–40 пин тенкĕ, юридици сăпачĕсене – 200–300 пин тенкĕ. Штрафсăр пуçне йĕркене пăсаканăн вăрман фондне кÿнĕ тăкака та 2–3 пин тенкĕ чухлĕ саплаштармалла. Енчен те симĕс чиперккене уйрăм хÿтĕлеври çутçанталăк территорийĕнче каснă-тăк – 3–6 пин тенкĕ таран. Тепĕр чухне административлă явап çирĕпреххине, уголовлине, куçма пултарать – енчен те тăкакĕ 5 пин тенкĕрен иртсен.  

Йывăçсене саккунсăр каснă тĕслĕхсем çинчен пĕлекенсене çак телефонсемпе шăнкăравлама сĕнетпĕр: 8(8352)56-52-80 – Чăваш ен Çутçанталăк министерстви; 8(8352) 40-24-00 – «Вăрман хуралĕ» учрежденин диспетчер пункчĕ, 8-800-100-94-60 – вăрман хуралĕн «тÿрĕ линийĕ».

И.КАДЫКОВ,

вăрман хуралĕ енĕпе тимлекен патшалăх инспекторĕ.