Раштав уйăхĕн 11-мĕшĕнче Пуканкасси ялĕнче Упа çырми юханшывĕ урлă çуран каçмалли кĕпере уçнă.

Пĕлтерĕшлĕ мероприятие район администрацийĕн пуçлăхĕ Андрей Тихонов, Ярмушка ял тăрăхĕн пуçлăхĕ Андрей Яковлев, Вăрнар район депутачĕ Георгий Сорокин, Пуканкасси ялĕн старости Альбина Фомина, ял депутачĕ Виктор Анисимов, ял çыннисем хутшăннă. Каçă хывас ĕç район пуçлăхĕнчен, Владимир Яковлевран, пуçланнă. Вăл вăрçă участникне Виктор Анисимович Анисимова саламлама килсен Пуканкасси çыннисен нушине асăрханă. «Пуçаруллă бюджет» программăна хутшăнма сĕнÿ панă. Упа çырми урлă каçса çÿреме çурхи шыв-шур вăхăтĕнче май килмен пирки, çынсем пĕр шухăшлă пулса, асăннă программăна хутшăнма укçа пуçтарнă. «Звездопад» пĕрлешÿ пулăшнă. Анатолий Николаевич Крючков предприниматель ĕçе пурнăçлама хутшăннă.

Çак урамра çуралса ÿснĕ ĕçпе вăрçă ветеранĕ Виктор Анисимов хĕрлĕ хăю каснă. Çамрăк ăрупа çĕнĕ кĕпер урлă каçнă. Пурте пĕр шухăшлăн пулса ăна «Хыçалкас каççи» ят панă. Паллах, Хыçалкасси урамĕнче пурăнакан çынсем кăмăллă юлнă.

Мăн Элмене кĕнĕ çĕрте илемлĕ стела аякранах курăнать.

Ăна уçма Пуканкассинчи Обществăлла Канашăн ертÿçи, Ярмушка ял тăрăхĕн депутатсен Пухăвĕн председателĕ Виктор Анисимов хутшăнчĕ. Ял-йыш пуçарулăх кăтартнипе, ниме йăлипе укçа-тенкĕ пухнипе çакăн пек хитре стела çĕкленсе ларчĕ. Юпа çинче çапла çырнă: «Ывăлсемпе хĕрсем! Тăван яла ан манăр, килсе çÿрĕр. Аçу-аннÿ ятне çÿлте тытăр! Телейлĕ çул пултăр!»

Лиана ГРИГОРЬЕВА.