Çывхарса килекен Çĕнĕ çул умĕн Калининăри вăтам шкулта вĕренÿ хастарĕсене, район тата республика шайĕнчи спорт мероприятийĕсен çĕнтерÿçисемпе призерĕсене чысланă.

Шкул директорĕ Татьяна Ефимова палăртнă тăрăх, хальхи вăхăтра шкулта 234 вĕренекен ăс пухать. Вĕсенчен 22-шĕн спортри çитĕнĕвĕсем çÿллĕ. Вĕренÿ çулĕ тăршшĕпех вĕсем спортăн тĕрлĕ тĕсри ăмăртăвĕсене хутшăннă, призлă вырăнсене çĕнсе илнĕ. Кăçал шкул ачисен спартакиадинче Калининăри шкулта вĕренекенсем 2-мĕш вырăн йышăннă. Вăрнар район администрацийĕ шкула спорт инвентарĕ туянма 15 пин тенкĕ уйăрнă.

Ачасене спорт залĕнче чысланă. Çамрăк спортсменсем Раççей, Чăваш ен, шкул ялавĕсене йăтса утнă.

Каласа хăвармалла, Калининăри шкул 170 çулта. Кăçал ун тăррине юсаса çĕнетнĕ. «ВиКа» подряд организацийĕ юсав ĕçĕсене кĕркуннехи каникул вăхăтĕнче хăвăрт тата пахалăхлă пурнăçланă. Шкул директорĕ Татьяна Ефимова район администрацийĕн пуçлăхне Андрей Тихонова, вĕрентÿпе çамрăксен политикин пайĕн пуçлăхне Денис Трофимова, «ВиКа» тулли мар яваплă обществăн ертÿçине юсав ĕçĕсене вăхăтра тата ăнăçлă ирттерме пулăшнăшăн чĕререн тав тăвать.

Чи лайăх спортсменсене шкул юбилейĕ тĕлне кăларнă астăвăм медалĕсемпе чысланă. Вĕсене Даниил Кондратьев, Даша Леонтьева тата Игорь Ефимов тивĕçнĕ. Уйрăмах 9-мĕш класра вĕренекен Игорь Ефимова палăртмалла. Вăл нумаях пулмасть перекладина çинче 31 хут туртăнса республикăри çамрăк каччăсем хушшинче чи лайăх результат кăтартнă.

Директор палăртнă тăрăх, шкулта активлă тата талантлă ачасем чылай. Çулталăк тăршшĕпе тĕрлĕ конкурссемпе олимпиадăсене хутшăнса призлă вырăнсене йышăннисене Çĕнĕ çул умĕн Чăваш ен Патшалăх Канашĕн депутачĕ, «Август» Фирмăн «Вăрнарти хутăш препаратсен завочĕ» филиалĕн директорĕ Владимир Свешников чысларĕ, Хĕл Мучипе пĕрле парнесем пачĕ. 2021 çула Калининăри шкулта вĕренекенсем лайăх кăтартусемпе вĕçлеççĕ.

Оксана СЕМЕНОВА.