Çĕнĕ çул алкумне çитрĕ ĕнтĕ. Кăçал мĕнле тăрăшнине тишкерме шăпах та вăхăт. Раççей ял хуçалăх центрĕн республикăри филиалĕнче ĕçлекенсем те çак тĕллевпех пуху ирттернĕ. Мероприятие вăрнарсем те хутшăннă.

Сергей Павлов ертÿçĕ сăмах илнĕ май, ял хуçалăх культурисене çитĕнтерекенсене паха вăрлăх ĕрчетме тата ÿсентăрана хÿтĕлеме пулăшас тĕлĕшпе учреждени патшалăх заданийĕсене ăнăçлă пурнăçланине палăртнă. Сергей Владимирович пĕлтернĕ тăрăх, бюджет тулашĕнчи ĕç-хĕлпе çыхăннă тупăш иртнĕ çулхинчен 15 процент ÿснĕ.

2021 çулта Раççей ял хуçалăх центрĕн республикăри филиалĕн специалисчĕсем калăпăшлă ĕçсем туса ирттернĕ. Пĕтĕмĕшле илсен кăтартусем çапларах – ял хуçалăх культурисен вăрлăх пахалăхне 203 пин тонна тĕрĕсленĕ, çав шутра çĕрулми 7,87 пин тонна. Тĕш тырăсене 40 пин тонна, «иккĕмĕш çăкăра» 3,05 пин тонна сертификациленĕ, 690   килĕшÿ сертификачĕ çырнă, 582,47 пин гектар çинче фитосанитари мониторингĕ тунă. Кунсăр пуçне вăрлăхсем фитоэкспертиза витĕр те тухнă. Специалистсем кăçал 79,3 тонна ытла микробиологи препарачĕ тата гумат хатĕрленĕ.

Раççей ял хуçалăх центрĕн аталанăвне Вăрнар енчи уйрăм та пысăк тÿпе хывать. Вăл ÿсĕм хыççăн ÿсĕм тăвать. Пухура кăçалхи ĕç кăтартăвĕсене пĕтĕмлетнĕ хыççăн районти уйрăм пĕрремĕш вырăна тухни çинчен пĕлтернĕ. Вăл Диплома тата хаклă парнене тивĕçнĕ.

– Пĕлтĕр эпир республикăра иккĕмĕшчĕ. Кăçал коллектив тата хастартарах пулчĕ, çавăнпа та мала тухма пултартăмăр. Специалистсене пурне те тав сăмахĕ калатăп, иксĕлми вăй-халпа çирĕп сывлăх, ĕçре ăнăçу, çемьере килĕшÿ сунатăп, – терĕ районти уйрăм ертÿçи Вячеслав Алексеев.

Предприяти-организацин çитĕнĕвĕ тилхепене кам тытса пынипе тÿреммĕн çыхăннă. Вячеслав Николаевич, акă, агропромышленность комплексне аталантарассипе чылай çул тÿрĕ кăмăлпа ĕçлет. Тăрăшакан çын хисепе тивĕçетех. Вячеслав Алексеева Чăваш Республикин Ял хуçалăх министерствин Хисеп грамотипе чысланă. Паллах, вăрнарсене хастар ĕçлеме ентешĕсем те тĕслĕх кăтартаççĕ. Раççей ял хуçалăх центрĕн Чăваш енри филиалĕн ертÿçи Сергей Павлов Вăрнар районĕнчи Кульцав ялĕнче çуралса ÿснĕ. Вăл ял хуçалăх тата çутçанталăк ресурсĕсен министрĕсенче те, ЧРПатшалăх Канашĕн экономика политикин, АПК тата экологи комитечĕн ертÿçинче те вăй хунă. Халĕ те хăйĕн ĕçне тивĕçлĕ шайра пурнăçласа пырать.

Кадрсем пĕтĕм ыйтăва татса параççĕ, теççĕ. Районти уйрăмра маттурсем, яваплăха туйса тимлекенсем кăна ĕçлеççĕ. Учрежденире нумай çул тăрăшакан Елена Спиридонова ЧР Патшалăх Канашĕн Тав çырăвне тивĕçнĕ.

Елена ПОРФИРЬЕВА.