Хисеплĕ вулакансем! Паян эсир алăра «Çĕнтерÿ çулĕн» кăçалхи юлашки номерне тытатăр. Çулталăк тăршшĕпех эпир, хаклă туссемĕр, хаçатăн кашни номерĕ, статйи вулаканшăн интереслĕ, усăллă, кирлĕ пултăр тесе тăрăшрăмăр.

Паян, цифра ĕмĕрĕнче, паллах, хаçатсене çăмăлах мар. Ялсене тухса çÿренĕ май, хăшĕсем пĕтĕм информацие интернетра тупатпăр тенине те илтме пулать. Паллах, ку сăмахсене ытларах чухне алла хаçат-журнал тытса курман çын калать. Интернета эпир те сивлеместпĕр. Пирĕн те паян ун уçлăхĕнче тĕрлĕ платформăсене алла илме тивет. «Çĕнтерÿ çулĕ» социаллă сетьсенче те – Инстаграмра, «Одноклассники», «ВКонтакте» страницăсенче – хыпарсемпе паллаштарать. Анчах хаçатпа ку формата пачах та пĕр шая лартас килмест. Пичет сăмахĕ, хаçат вăйĕ çав-çавах пĕлтерĕшлĕрех. Вăл ăса палăрмалла ытларах вĕрентет.

Тепĕр икĕ кунтан кăçалхи календаре хупатпăр, çĕннине уçса Çĕнĕ çула çĕнĕ ĕмĕт-шухăшпа кĕретпĕр. Паян эпĕ 2022-мĕшĕнче те «Çĕнтерÿ çулĕпе» юнашар пулма килĕшнĕ, хаçата пĕрремĕш хут çырăннă çынсене чĕререн тав тăватăп. Журналистсем – Елена Порфирьева, Ирина Яковлева, ытти хаçатçăсем – Оксана Семенова, Марина Сергеева, Инга Свечкина, Татьяна Данилова, Ирина Андреева, Андрей Николаев, Руслан Волков – çитес çул та чун çимĕçĕ пуянрах та кăсăклăрах пултăр тесе тăрăшĕç.

Хаçат вулакан пуррипе пурăнать. Вăл «Çĕнтерÿ çулĕпе» çулран-çул туслă пулнипе хаçатăн ĕмĕрĕ тăсăлать.

«Çĕнтерÿ çулĕ» страницисене интереслĕрех тăвас ĕçе районти кашни çын хутшăнма пултарать. Сирĕн тăрăхра мĕнле те пулин мероприяти иртрĕ-и; Е сирĕнпе юнашар лайăх çынсем пурăнаççĕ, е талантлă çынсем пур; Çырса ярăр е пĕлтерĕр – сирĕн хыпар хаçатра тухатех!

Паян эпир вырăнти авторсем пуррипе чăннипех мухтанатпăр. Çулталăк тăршшĕпе вĕсем тĕрлĕ информаципе тивĕçтерсе хаçата кăсăклăрах тума пулăшрĕç. Вĕсем – Валерий Кошкин (Шупашкар), Вениамин Сорокин (Вăрнар), Нина Парамонова (Малтикас Ялтăра), Вячеслав Алексеев (Кивçурт Енĕш), Николай Иванов (Çĕрпел), Федор Кузьмин (Хурăнсур Çармăс), Нина Гречко (Шупашкар), Лиана Григорьева (Пуканкасси), Людмила Иванова (Вăрнарти хутăш препаратсен завочĕ), Василий Иванов (Тимĕрçкасси), Геннадий Иванов (Пăртас), Тамара Бондарь (Тĕмпек), А.Хапăс, Елена Анисимова (район администрацийĕн пресс-служби), Елена Шарипова (Вăрнар), Улькка Эльмен, С.Уйкас, Р.Кĕрхи (Волкова), Б.Янсарин авторсем, сăвă çыракансем... Вĕсенчен тата çĕнĕ авторсенчен Çĕнĕ çулта та материалсем кĕтетпĕр.

Хаçат редакцийĕпе тачă çыхăнса ĕçлекен предприяти-организацисене те – район администрацине, полицин «Вурнарский» пайне, район прокуратурине, налук, Пенси фончĕн, социаллă хÿтлĕх службисене, Вăрнарти 2-мĕш, Калининăри, Санарпуçĕнчи вăтам шкулсене, поселокри «Рябинка», «Ручеек», «Березка», «Ромашка» ача сачĕсене, «Август» Фирмăн «Вăрнарти хутăш препаратсен завочĕ» филиалне, Вăрнарти аш-какай комбинатне, Хăйминчен уйăрнă типĕтнĕ сĕт заводне, район тĕп больницине, «Энергостроймонтаж» обществăна, Калинино райпоне, районти ветстанцине, ыттисене чĕререн пысăк тав. Çитес çул та алла-аллăн тытăнса ĕçлесчĕ!

Юратнă вулаканăмăрсем! Çĕнĕ çулта ырă та кăмăллă самантсем кăна пулччăр! Паянхи кунхи хаяр чире парăнар мар, редакци коллективĕ пурне те çирĕп сывлăх, иксĕлми вăй-хал, ăнăçу, телей пиллет. Хаçат вулар – пĕрле пулар!

Светлана ЧИКМЯКОВА,

«Çĕнтерÿ çулĕ» хаçатăн тĕп редакторĕ.