Транспорт полицийĕн сотрудникĕсем нумаях пулмасть Канашра вăрă-хурахла çаратнине уçса панă. Шар кураканĕ вара – Вăрнар район çынни.

Çав кун Канаш станцийĕнчи линейнăй пай сотрудникĕсем çывăхри территорире патрульпе çÿренĕ. Йĕркене пăсакан арçынна асăрханă: хайхискер обществăлла вырăнта ÿсĕр пулнă-мĕн. Ăна административлă протокол çырма тесе полици пÿлĕмне илсе килнĕ. Палăртнă тăрăх, вăл 57-ри, Шупашкарта пурăнакан çын.

Арçыннăн япалисене пăхса тухнă чух транспорт полицейскийĕсем унпа пĕрле сумка пуррине асăрханă. Унта – ют паспорт, кĕсье телефонĕ, планшет тата банк карттисем. Ăçтан тупăннă-ха вĕсем; Полицейскисем тĕпчесе пĕлнех çакна: вăл хăйĕн ăнсăртран тупăннă «пĕлĕшне» çаратнă иккен.

Канашри чукун çул вокзалĕнче поезд кĕтнĕ чух  вăл унччен курман арçынпа – 49-ти Вăрнар район çыннипе – паллашнă. Спиртлă шĕвексем ĕçнĕ май калаçу хĕрсех пынă. Шупашкар çынни теприне Хусана пĕрле ĕç шырама кайма чĕннĕ. Электропоезда та ларнă-ха вĕсем, анчах кирлĕ станцие çитеймен – билетсăр «ярăннăшăн» кассир антарса хăварнă.

«Канаш-2» чарăну платформинче каллех эрехе иленнĕ ик «юлташ». Тахăш самантра Шупашкар арçыннин çĕнĕ пĕлĕшĕн сумка-планшетне вăрлас шухăш çуралнă. Анчах хуçи пурлăхĕпе уйрăлас темен. Тин кăна пĕрле эрех ĕçсе ларнă çын хăйне хĕнеме тытăнсан Вăрнар арçынни тарма хăтланнă. Май килмен% лешĕ хăваласа çитсе сумкине те, унти япаласене те туртса илнĕ (пĕтĕмпе 10 пин ытла тенкĕлĕх). Çакăн хыççăн Канаш станцийĕн вокзалĕнче чарнă та ăна транспорт полицийĕн сотрудникĕсем.

Преступлени тĕлĕшпе уголовлă ĕç пуçарнă. Уншăн 7 çул таран ирĕксĕр хăварма пултараççĕ. Хальхи вăхăтра, следстви ĕçĕсен тапхăрĕнче, вăрă-хураха тытса чарма йышăннă.

Ирина ВАСИЛЬЕВА,

Раççей ШĔМ-ĕн Чăваш енри транспорт çинчи линейнăй пайĕн инспекторĕ

шалти службăн аслă лейтенанчĕ.