Хĕл хырăмĕ пысăк. Выльăх апачĕ çителĕклĕ хатĕрлесен аш-пăш, сĕт туса илесси те ÿсĕ. Çĕр ĕçченĕсем уяр кунпа туллин усă курма тăрăшаççĕ.

Техника шавĕ уй-хиртен каçченех татăлмасть.

Симĕс ĕççи анлă сарăлса пырать. Çак вăхăт тĕлне ял хуçалăх организацийĕсем нумай çул ÿсекен курăксене 4761 гектар çулнă. Выльăх-чĕрлĕхе хĕл каçарма 4876 тонна утă янтăланă. Ку ĕçре уйрăмах Вăрнарти аш-какай комбиначĕ хастар, агрохолдингра 1200 тонна утă типĕтнĕ. Выльăх апатне «Знамя» тата Карл Маркс ячĕллĕ кооперативсенче 500-шер тонна, «Броневик» ял хуçалăх предприятийĕнче 340 тонна хатĕрленĕ. Фермерсенчен Виталий Яковлев хуçалăхĕ малта, 210 тонна утă типĕтнĕ.

Ешĕл масса хатĕрлессипе те ĕçсем кал-кал пыраççĕ. Район аграрийĕсем 13818 тонна сенаж хывнă. Уйрăмах ÿсĕмлĕ тимлекен хуçалăхсенче ĕç кăтартăвĕсем çапларах – аш-какай комбинатĕнче 8700 тонна, Карл Маркс ячĕллĕ кооперативра – 2468, «Кольцовкăра» 1300 тонна сенаж янтăланă. Ешĕл массăна фермер хуçалăхĕнче те хывнă. Ырă тĕслĕх кăтартаканĕ – Григорий Лукин хресчен (фермер) хуçалăхĕ. Кунта сенаж 150 тонна хывнă.

Силос хатĕрлессипе пĕртен-пĕр ял хуçалăх производство кооперативĕнче – «Победăра» – тăрăшаççĕ: çак вăхăт тĕлне 500 тонна силос янтăланă.

Вăхăт хăвăрт шăвать. Кĕр аки те çывхарать. Тăватă предприятире – аш-какай комбинатĕнче, «Агрохмельте», «Янгорчинăра», «Гвардеецра» – çĕр хатĕрлеме тытăннă ĕнтĕ. Пĕрлехи ĕç кăтартăвĕ – 360 гектар.

Елена ПОРФИРЬЕВА.