Анăç çĕршывĕсем Раççее хирĕç эко-номика «вăрçине» пуç-ланă теме пулать. Вĕсем йышăнакан санкцисем, куратпăр, пурне те сиенлĕ витĕм кÿреççĕ.

Анчах, тепĕр енчен, вĕсем хамăрăн экономикăн мĕнпур отрасльне çÿллĕрех шая çĕклеме, никама пăхăнмасăр аталанма çул-йĕрсем шырама та хистеççĕ. Иккĕленÿ çук: ура çине тăрăпăр, анчах пĕтĕмпех хăй еккине вырнаçма вăхăт тата тĕрĕс мерăсем йышăнни кирлĕ.

Паллах, кăткăс лару-тăру, финанс-экономика тĕлĕшĕнчен хĕсĕрлеме хăтланни çынсенче те, бизнес тытăмĕнче те пăлхану çуратать. Пысăк бизнеспа танлаштарсан, пĕчĕк тата вăтам предпринимательлĕхе тăрук йăтăнса аннă чăрмавсене чăтса ирттерме уйрăмах йывăр. Кăткăс çак тапхăртан тавăрайми çухатусемсĕр тухас тесе ĕнтĕ Раççей Президенчĕ Владимир Путин çийĕнчех граждансене те, бизнеса та çăмăллăхсем памалли саккуна çирĕплетрĕ. Правительство сĕннĕ мерăсем Раççей çыннисемпе предпринимательсене анăç санкцийĕсене пула çивĕчленнĕ лару-тăрăва çĕнтерме пулăшĕç.

Пенси тÿлевĕсем тата социаллă сфера

Халĕ правительствăн пенси çумне тивекен хушма социаллă тÿлеве саккунпа çирĕплетнĕ шайран пысăкрах йĕркелеме право пур. Министрсен Кабинечĕ çавăн пекех социаллă пенсисене тата страхлав пенсийĕн тÿлевĕсен виçине хушма индексаци тума пултарать. Çакăнпа пĕрлех правительствăна 2022 çуллăха ĕç тÿлевĕн тата пурăнма кирлĕ минимумăн чи пĕчĕк виçисене палăртма та право панă.

Кредит каникулĕсем

Хăйĕн йышăнăвĕпе çĕршыв Президенчĕ граждансене, пĕчĕк тата вăтам предпринимательлĕхе çĕнĕ кредит каникулĕсем уçма ирĕк парать, çав шутра – ипотека илнисене те. Çăмăллăх йĕрки кредит килĕшĕвне кăçалхи мартăн 1-мĕшĕччен çырнисене пырса тивет. «Отсрочка» ыйтса сентябрĕн 30-мĕшĕччен çырмалла. Каникулпа тупăшĕ 30 процентран ытларах чакнисене тивĕçтереççĕ.

Бизнес тĕрĕслевĕ

Хальхи йывăр тапхăрта правительство организацисене ĕç-хĕле лицензие тăсмасăрах пурнăçлама май пама пултарать. Çавăн пекех – лицензие обязательнăй тĕрĕслевсĕр, патшалăх пошлинин тÿлевĕсĕр илме те.

Пĕчĕк тата вăтам предпринимательлĕх умĕнчи кăткăслăхсене сирес тесе, сăмахран, кăçал ку предприятисен планпа пăхнă тĕрĕслевĕсене пăрахăçлама йышăннă. IT- сферăри патшалăх аккредитацийĕ пур организацисене вара 2024 çул вĕçĕчченех тĕрĕслемĕç.

Закупкăсем

Федераллă правительствăна, регионсемпе муниципалитетсене халĕ патшалăх тата муниципалитет валли тавар туяннă чух контракт условийĕсене улăштарас правăпа тивĕçтернĕ. Медицина организацийĕсем те хăйсене кирлĕ изделисене котировкăсен электронлă мелĕпе ытларах илме пултарĕç. Çăмăллăхлă йĕрке эмелсемпе расхут материалĕсен туянăвне те пырса тивет. Кунсăр пуçне, пĕртен-пĕр поставщикран пĕр пациента сиплеме туянакан эмелсен суммине 1,5 миллион тенкĕ таран хăпартнă.    

Ирина ЯКОВЛЕВА.