Чăвашстат 2016 çулхи Пĕтĕм Раççейри ял хуçалăх çыравĕн тулли пĕтĕмлетĕвĕсем тăрăх ятарлă изданисем пичетлесе кăларчĕ. Хаçатăн иртнĕ номерĕсенче унăн хăшпĕр пайĕсемпе паллаштарнăччĕ. Паянхи сăмах ĕç ресурсĕсем пирки.

2016 çулхи июлĕн 1-мĕшĕ тĕлне республикăри ял хуçалăх организацийĕсенче 13 пине яхăн çын тăрăшнă. Вăл шутран 90 проценчĕ – яланхи ĕçченсем: 55 проценчĕ арçынсем, 45-шĕ – хĕрарăмсем.

Вăтамран пĕр организацие 42 ĕçчен пырса тивнĕ. Ÿсĕмпе илес пулсан, кăтартусем çапларах: арçынсенчен 30 çула çитмен ĕçченсем 6 процент, 30– 59 çулхисем – 45 процент, 60 çултан аслăраххисем – 4 процент. Хĕрарăмсем: 30 çулчченхисем – 4 процент, 30– 54 çулхисем – 35 процент, 55 çултан аслăраххисем – 6 процент.

Ял хуçалăх организацийĕсен ертÿçисенчен 59 проценчĕ 50 çулта е аслăрах. 86 проценчĕ аслă пĕлÿ илнĕ, вăл шутран 48 проценчĕ – ял хуçалăхĕ енĕпе.

Ертÿçĕсенчен 40 ытла проценчĕн ял хуçалăхĕнчи стажĕ 21– 31 çулпа танлашать, 6 проценчĕн 10 çул таран, 43 проценчĕн – 31 çул е ытларах. Ертÿçĕсенчен ытларахăшĕ арçынсем: 91 процент.

Хресчен (фермер) хуçалăхĕсенче тата уйрăм предпринимательсем патĕнче 4 пине яхăн çын тăрăшни паллă. Пĕр хуçалăха виçĕ çын тивет. Вĕсен пуçлăхĕсен 60 проценчĕ – 49 çула çитичченхи ÿсĕмре. Аслă пĕлĕве пĕрре виççĕмĕш пайĕ илнĕ. Çуррине яхăнĕ ял хуçалăхĕнче 10 çул таран тăрăшать. Ку тĕслĕхре те ертÿçĕре ытларах арçынсем тăрăшаççĕ – 83 процент.

Аса илтерме, 2016 çулхи Пĕтĕм Раççейри ял хуçалăх çыравĕн изданийĕсен электронлă версийĕпе Чăвашстатăн официаллă сайтĕнче (http://chuvach.gks.ru) паллашма май пур.

Светлана ЧИКМЯКОВА.