Çÿп-çап реформи пурнăçа кĕнĕренпе çулталăк ытларах иртрĕ. Çак тапхăрта республикăра йăлари хытă каяшсене пĕтĕмпе 3 млн кубла метр ытла тиесе тухнă.

Паянхи кун тĕлне çÿп-çапа пĕтĕмпе 13823 вырăнтан илсе тухаççĕ. Çулталăк пуçламăшĕ тĕлне контейнерсен пĕтĕмĕшле хисепĕ 18 пин пулнă. Кăçал республика бюджечĕ муниципаллă районсем валли евроконтейнерсем туянма 87 млн тенкĕ уйăрнă. Вĕсемпе çуллахи вăхăтра пирĕн района та тивĕçтернĕччĕ.

Нумайăшĕ экологие сыхлассипе çыхăннă çĕнĕлĕхе ырласа йышăнчĕ. ТКО-шăн тăратакан хывăмсене те вăхăтра тÿлесе пырать.

Анчах ку енĕпе ыйтусем пур-ха. Вăл шăпах тÿлевсене пырса тивет. Республикăра ку тивĕçтерÿшĕн пĕтĕмĕшле пухăм 81 процентпа танлашнă. Уйрăм çынсен тата юридици сăпачĕсен парăмĕ – 239,4 миллион тенкĕ. Çак цифрăсене Чăваш ен Министрсен Кабинечĕн председателĕ Иван Моторин ТКО çаврăнăшĕн реформине пурнăçа кĕртессипе çыхăннă канашлура пĕлтернĕ. Видеоçыхăну мелĕпе унта район администрацийĕн пуçлăхĕ Леонид Николаев та хутшăннă.

Вăрнар районне илес пулсан, ТКО тÿлевĕн кăтартăвĕ республикăринчен пĕчĕкрех: 55,91 процент. Ял-хула поселенийĕсемпе илес пулсан, кăтартусем çапларах: Çавалкас – 75,06%, Аçăмçырми – 72,43%, Санарпуç – 66,84%, Вăрнар – 65,13%, Уйкас Кипек – 64,51%, Кĕçĕн Кипек – 62,1%, Упнер – 60,25%, Мăн Турхан – 59,53%, Калинино – 57,01%, Çĕрпел – 56,69%, Хирпуç – 55,43%, Вăрманкас – 53,49%, Ярмушка – 52,32%, Мăн Явăш – 51,27%, Ершепуç – 50,69%, Малти Ишек – 46,88%, Кульцав – 42,79%, Шĕнер Ишек – 41,8%, Пăртас – 37,14%.

Район администрацийĕн пуçлăхĕ Леонид Николаев ТКО тивĕçтерĕвĕшĕн тÿлеве вăхăтра хывманни йывăрлăхсем кăларса тăратма пултарассине палăртрĕ. Регоператор çÿп-çапа тиесе тухма пăрахасси таранах. Çавăнпа та вăл халăха ку тĕлĕшпе яваплăха туйма ыйтрĕ.

Паллах, парăмсене ахаль хăвармĕç. ТКО-шăн тăратакан квитанцисемшĕн яваплăх туйманнисем тĕлĕшпе претензипе тавăç ĕçĕсене ирттереççĕ. Çавăнпа та суд-мĕн тăрăх çÿрес мар тесен тÿлеве тăсса ямасăр хывмалла.

Аса илтерме, 2020 çулхи январьтен йăлари хытă каяшсен çын пуçне тивекен нормативĕсене чакарнă: ялта пурăнакансем январь –июнь уйăхĕсенче 49,72 тенкĕ, хула çыннисем 60,8 тенкĕ тÿлĕç. Июлĕн 1-мĕшĕнчен ку тивĕçтерÿ ял çыннисемшĕн 60,6 тенкĕпе танлашĕ, хула çыннисемшĕн 73 тенкĕрен кăшт пысăкрах пулĕ.

Светлана ЧИКМЯКОВА.