Канмалли кунсенче ăмăртура пулни Ярмушкари Надежда Лаврентьеван чунне хăпартлантарни тÿрех сисĕнчĕ. Çапла пулмасăр май та çук – вăл Хусанта хăвăрт утассипе ветерансем хушшинче иртнĕ çĕршыв чемпионатĕнче палăрнă.

Тăватă команда – Раççей, Мускав, Санкт-Петербург тата Тутарстан – матчĕ тĕрлĕ регион спортсменĕсене пуçтарнă. Надежда Алексеевна унта Элĕк районĕнчи паллă спортсменсемпе – Олимпиадăна хутшăнма тивĕçнĕ Виктор Семеновпа тата Владимир Гордеевпа – пĕрле хутшăннă.

Хăй ушкăнĕнче старта вунпилĕк атлетпа пĕрле тухнă вăл. Виçĕ километрта çуллахи чемпионатри пекех Мускав спортсменкине Наталья Терентьевана выляса янă.

– Çакнашкал ăмăртусене хутшăнни кăмăла çĕклет, пурнăç хавалне ÿстерет, сывлăха çирĕплетет. Унсăр пуçне, тĕрлĕ хуласене çитсе курни те мĕн тери паха. Çитес çул çуллахи чемпионат Адлерта, хĕллехи Санкт-Петербургра иртмелле, унта та хутшăнасшăн, – терĕ Надежда Лаврентьева кĕмĕл медальне кăтартнă май.

Ăнтăлу пысăк пулниех çитĕнÿсем тума пулăшать ĕнтĕ ăна. Пĕр кун сиктермесĕр ир те, каç та тренировкăсенче пиçĕхет. Спортра наянланнипе малалла каяймăн, тет вăл.

Светлана ЧИКМЯКОВА.