Чăваш енре республикăри амăшĕн (çемье) капиталне тÿлесси малалла пырать.

2019 çул пуçланнăранпа ку капиталпа 1579 çемье усă курнă. Пĕтĕмпе 109,5 млн тенкĕлĕх. Вĕсенчен 65,7 проценчĕ патшалăх пулăшăвĕпе çурт-йĕр условийĕсене лайăхлатма усă курнă. 34,3 проценчĕ – ачисене вĕрентме.

Вăрнар районĕнче амăшĕн капиталĕн укçи-тенкипе усă курма 60 заявлени пулнă. Пĕтĕмĕшле сумма – 3,5 млн ытларах тенкĕлĕх.

Кăçал республикăри амăшĕн (çемье) капиталне тÿлеме бюджетран 120 млн тенкĕ уйăрнă.

Халăха социаллă хÿтлĕхпе тивĕçтерекен районти пай пуçлăхĕ Ирина Смолина республикăри амăшĕн (çемье) капиталĕн укçи-тенкипе пурнăç условийĕсене лайăхлатма, ачисене вĕрентме, сусăр ачасен социаллă адаптацийĕ валли таварсем туянма тата тивĕçтерÿсем илме усă курма юранине аса илтерчĕ.

Республикăри амăшĕн капиталне çемьери виççĕмĕш е ун хыççăнхи ачасемшĕн параççĕ.

Ку категорири çемьесем çавăн пекех уйăхсеренхи укçа тÿлевне те тивĕçеççĕ. Ноябрьте ăна 3976 çынна 42,14 млн тенкĕ тÿленĕ. Çулталăк пуçланнăранпа – 497,57 млн тенкĕ.

Çакна та пĕлтермелле, çулталăк пуçланнăранпа республикăра 6933 çемье нумай ачаллă çемьен удостоверенине илнĕ.