Кĕç-вĕç Çĕнĕ çула кĕретпĕр, анчах çанталăкĕ хĕллехи сивĕпе те, шап-шурă юрĕпе те савăнтармарĕ те уяв кăмăлĕ те сахалрахчĕ.

Юнкун поселокри тĕп площадьре кĕрленĕ праçник вара лару-тăрăва пуçĕпех улăштарчĕ: чуна ăшăтакан хаваслăх парнелерĕ, чи кĕтнĕ уяв алăк умне çитнине туйтарчĕ. Таврана илем кÿрекен чиперккене – районăн тĕп ăлкине – чысласа уçнă самант чăннипех асамлă уява çаврăнчĕ. Çак кунтан поселокра, мĕнпур ялта Çĕнĕ çул мероприятийĕсем старт илчĕç.

Площадьре хăй тавра лăк тулли халăх пухрĕ Çĕнĕ çул чиперкки, теттесемпе капăрланса хÿхĕмленнĕскер кашнине, уйрăмах ача-пăчана, хăй патне йыхравларĕ. Вĕсене хĕллехи уявсем ячĕпе район администрацийĕн пуçлăхĕ Леонид Николаев ăшшăн саламларĕ, çитес çул хальхинчен тата ăнăçлăрах, телейлĕрех те ырăрах пултăр тесе сунчĕ.

Мероприяти Чăваш автономийĕн 100 çулхи юбилейне халалланă «Çĕнĕ çул Республики» марафон йĕркипе иртрĕ. Çак паллă дата тĕлне уявăн тĕп сăнарĕсем те тăрăшса хатĕрленнĕ – районăн тĕп ăлкине чыслама чăваш Хĕл Мучийĕпе Юрпики килсе çитрĕç. Асамлă тумтирĕсем чăваш тĕррисемпе эрешленĕрен çав тери капăр, Юрпикене вара чăваш хĕрĕсен тухйи ытарайми илем кÿчĕ. Тăван халăхăмăрăн хÿхĕм юррисем те чылай янăрарĕç праçникре.

Район артисчĕсем вара куракансене юмах ытамне илчĕç, театрализациленĕ представленипе савăнтарчĕç. Тухатмăш карчăкпа усал Арçури Хĕл Мучипе Юрпикене мĕн тĕрлĕ пăтăрмаха лектермерĕç пулĕ: кучченеçсен мишукне те йăкăртса тарчĕç, Юрпикене те тыткăна илчĕç, ытти те. Апла пулин те туслăхпа килĕшÿ çĕнтерчĕ, пурте пĕрле ешĕл чăрăш тавра карталанса, юрласа-ташласа савăнчĕç.

Чăваш автономийĕн 100 çулхи юбилейлă çулĕ çитнĕ май вăрнарсене тепĕр хаваслă парне те кĕтрĕ. Сцена çинчен Шупашкарти оперăпа балет театрĕн артисчĕсем Владимир Ашмарин, Маргарита Финогентова тата Василий Николаев вырăс тата чăваш юррисене тĕлĕнмелле сассисемпе чуна тыткăнламалла шăрантарчĕç. Уяв чаплă çутăсемпе йăлтăртатакан чăрăш çийĕн салют янипе вĕçленчĕ.

Ирина ЯКОВЛЕВА.