Юнкун Пĕрлехи информаци кунĕ йĕркипе районти вунвиçĕ ял-хула поселенийĕнче тĕлпулусем иртнĕ.

Ĕç коллективĕсенчи, ялсенчи тĕлпулусенче кун йĕркине кĕртнĕ ыйтусене анлăн сÿтсе явнă. Тĕприсенчен пĕри – Чăваш Республикинче муниципаллă пĕрлĕхсенче халăха пурăнма хăтлă хутлăх йĕркелесси. Хаçатра çырнăччĕ ĕнтĕ, территорисене, çуртсен картишĕсене, социаллă культура сферин объекчĕсене çыхăнтаракан тротуарсене йĕркене кĕртме республика бюджетĕнче 1,5 млрд тенкĕ уйăрнă. Хăтлăх ĕçĕсене пурнăçлама вырăнти бюджетăн 5 процент, халăхăн 1 процентран сахал мар укçа-тенкĕ хывмалла. Пирĕн района та пысăк сумма – 42 млн ытларах тенкĕ – тивĕçет.

Яллă вырăнта ĕçлекен хĕрарăмсем тĕлĕшпе Раççей Ĕç кодексне кĕртнĕ улшăнусем те пĕлтерĕшлĕ. Малалла вĕсен ĕç вăхăчĕ эрнере 36 сехетрен ытла пулмалла мар, çав вăхăтрах шалу тулли ĕç эрни чухнехи пекех пулĕ. Çавăн пекех вĕсен уйăхра пĕр кун тÿлевсĕр хушма кану кунĕ илме юрать.

Тĕлпулусенче çавăн пекех Чăваш ен Пуçлăхĕн ачасен сывлăхне çирĕплетме тата ÿт-пÿ аталанăвне хавхалантарма пулăшакан хушма мерисем пирки те калаçнă. Ачасене ишме вĕрентесси тĕп вырăнта. Районта ку ыйтăва татса парассипе Вăрнарти хутăш препаратсен завочĕн бассейн ертÿлĕхĕпе калаçусем пынине пĕлтернĕ.

Çавăн пекех районта «Культура» наци проектне пурнăçа кĕртес, Çĕнĕ çул уявĕсенче халăх нумай пухăнакан вырăнсенче пушар хăрушсăрлăхне тивĕçтерес ыйтусем те тĕп вырăна тухнă.

Пĕрлехи информаци кунне хутшăнса полицин «Вурнарский» пайĕн пуçлăхĕ Андрей Губанов вунпĕр уйăхри кăтартусемпе паллаштарнă. Вăл, мушенниксем хутшăннипе пулнă преступленисен шучĕ ÿснине кура, çынсене банк карттисемпе, интернетри суту-илÿре асăрхануллă пулмаллине аса илтернĕ.

Район администрацийĕнче ĕç коллективĕсемпе иртнĕ тĕлпулăва Чăваш енри Шалти ĕçсен министерствин ГИБДД управленийĕн пуçлăхĕн заместителĕ Геннадий Чурбанов та хутшăннă. Вăл Вăрнар район территорийĕнче ГИБДД-н регистраципе экзамен ушкăнĕ (РЭГ) хупăнассине пĕлтернĕ. Ку енĕпе тивĕçтерÿ илес тесен çынсен МФЦ-на тата патшалăх автоинспекцин çывăхра вырнаçнă подразделенийĕсене, сăмахран – Канаша е Çĕмĕрлене, каймалла.

Ял çыннисен те ыйтусем пулнă. Тĕпрен илсен, вĕсем çÿп-çап реформипе, çулсене юсассипе, пĕвесене тасатассипе çыхăннă.

Хамăр инф.