Тунтикун Чăваш ен Министрсен Кабинечĕн Председателĕ Иван Моторин республикăри терроризма хирĕçле комиссин черетлĕ ларăвне ирттернĕ.

Тĕп ыйтура – республикăри тата районсенчи комиссисен кăçалхи ĕç-хĕлне пĕтĕмлетесси. Çакăнпа пĕрлех 2020 çуллăх ĕç планне те, малашлăх задачисене те палăртнă.

Комисси аппарачĕн ертÿçи Евгений Терешин пĕлтернĕ тăрăх, регионта мониторинг тытăмĕ çĕнелет, террорла шухăш-кăмăла халăхра (çав шутра интернет урлă та) сарнине асăрхаттарнин витĕмĕ ÿсет. Çынсем нумай пухăнакан, обществăлла вырăнсен шанчăклă хÿтĕлевне тивĕçтерессипе те хушма мерăсем йышăннă. Республикăра пурăнакан ют çĕршыв гражданĕсем, ĕç мигранчĕсем те пĕрмаях асăрхавра. Паллах, терактсем çинчен суйса пĕлтернĕ тĕслĕхсем чылай пулни тивĕçлĕ мерăсем йышăнма хистет. Ку енĕпе паянхи кун тĕллевлĕ тимлеççĕ.

Çывăх вăхăтра республикăри мĕнпур хулапа ялта Çĕнĕ çулпа Раштав уявĕн мероприятийĕсем массăллă иртĕç. Çавна май пур çĕрте те обществăлла хăрушсăрлăх сыхлавне вăйлатмаллине каланă Евгений Терешин.

Обществăри çак усал пулăма хирĕç тăрассипе тÿрĕ кăмăлпа тимлекенсене те ларура уйрăммăн палăртнă.

Муниципаллă пĕрлĕх территорийĕнче терроризм енĕпе профилактика ĕçне эффективлă йĕркеленĕшĕн пысăк чыса Вăрнар район комиссийĕн секретарĕ Федор Петрович Тимофеев та тивĕçнĕ. Иван Моторин ăна Чăваш ен Пуçлăхĕн Тавĕпе наградăланă тата ун ятĕнчен сехет парнеленĕ.

Ирина ЯКОВЛЕВА.