Амăшĕн капиталĕпе усă курса пурăнмалли çурт-йĕр туяннă чухне ачисене пурне те пай уйăрмаллине манмалла мар, аса илтерет Росреестрăн Чăваш енри управленийĕ.

Кун пек чухне çемьен пĕтĕм членне пая кĕртмелле. Вăл шутра амăшĕн капиталĕн сертификатне илнĕ, ун укçипе хваттер е çурт туяннă хыççăн çуралнă ачасене те. Росреестр хăйĕн полномочийĕсен йĕркипе документсен право экспертизи вăхăтĕнче тупнă федераллă саккунсене пăснă фактсене прокуратурăна пĕлтерет.

– Нумай чухне ашшĕ-амăшĕ федераллă саккуна пĕлмесĕр пăсать. Иккĕмĕш ачана пай уйăрса çурт-йĕр туяннă тĕслĕхсем чылай-ха. Хыççăн виççĕмĕш ача çуралать, тăваттăмĕш... Вĕсене те пай уйăрмаллине манмалла мар. Çакăн валли нотариус патне каймалла, пайсене çĕнĕрен уйăрасси пирки килĕшÿ тумалла, унтан МФЦ-ра ачасен правине çирĕплетме Росреестр валли заявлени çырмалла. Паллах, эпир, регистрацилекен орган, пысăк çитменлĕхе – маткапитал укçипе усă курнă чухне ачисене пай уйăрманнине кăна куратпăр. Виççĕмĕш, тăваттăмĕш е хыççăнхи ачисене пая кĕртни-кĕртменнине йĕрлейместпĕр. Анчах та ку прокуратура тимлĕхĕнчен тухмасть. Çавăнпа та саккуна пĕлменни яваплăхран хăтармасть, – пĕлтерет Росреестрăн Чăваш енри управленийĕн ертÿçи Екатерина Карпеева.

Кăçалхи январьтен амăшĕн капиталĕн виçи 466 617 тенке çити ÿснĕ. Унпа пурăнмалли условисене лайăхлатма, ачасене вĕрентме, сахал тупăшлă çемьесене уйăхсеренхи тÿлеве илме, инвалид-ачасем валли ятарлă таварсем туянма, амăшĕн пенсине ÿстерме яма юрать.

С.ЧИКМЯКОВА.