Чăваш кĕнеке издательстви 100 çул тултарнине халалласа районти культура çур-тĕнче авторсемпе вулакансен пултарулăх тĕлпулăвĕ иртнĕ. Пĕлтерĕшлĕ мероприятие Вăрнар енче çуралса ÿснĕ çыравçăсем – Улькка Элмен тата Ольга Австрийская (Иванова) – килнĕ.

Уява Чăваш ен кĕнеке издательствин генеральнăй директорĕ Светлана Каликова уçнă. Вăл Аслă Çĕнтерÿ тунăранпа 75 çул тата Чăваш автономийĕ йĕркеленнĕренпе 100 çул çитнине халалласа издательство кăçал кĕнекесем кăларма палăртнине пĕлтернĕ. Район тĕп библиотекине чăвашла тата вырăсла пичетленнĕ «Библейские рассказы. Библи калавĕсем» кĕнеке парнеленĕ.

Улькка Элменпе Ольга Австрийская вулакансене хăйсен кĕнекисемпе паллаштарнă, литература хайлавĕсене мĕнле çырни çинчен каласа кăтартнă, тĕлпулăва килнисен ыйтăвĕсене хуравланă.

Кунсăр пуçне Ольга Австрийская çĕнĕ ача-пăча кĕнекисемпе паллаштарнă. Вĕсем – «Тилĕ вĕçме вĕренни. Как лиса летать училась», «Юмахсен пуххи», «Тилĕ юмахĕсем», «Мăшăр çунат» (авторĕ Г.Матвеева) тата ыттисем. Çамрăк автор Ольга Австрийская, Чăваш кĕнеке издательствинче илемлĕ литература редакторĕнче тăрăшаканскер, «Çĕршывăмçăм, Чăваш çĕршывĕ. Чувашия родная» кĕнеке чăвашла тата вырăсла пичетленсе тухмалли çинчен пĕлтернĕ. Çавăн пекех вăл хăй хатĕрлекен «Саламлăр аннĕре» сборник пирки туллин каласа кăтартнă.

Издательство çулсерен «Чăваш кĕнеки. Çамрăк талантсем» конкурс ирттерет. «Чăваш ен издательствин чи лайăх кĕнеки» номинацие вара пур ÿсĕмри çынсем те хутшăнма пултараççĕ – чи юратнă кĕнеке çинчен рецензи çырмалла кăна. Çавăн пекех пур ÿсĕмри вулакансем хушшинче «Кĕнеке пурнăçа вĕрентет» викторина иртет. Ольга Австрийская конкурссене хастар хутшăнма чĕннĕ.

Тĕлпулăва Нина Пăрчăкан поэтесса та килнĕ, вăл хăй çырнă сăвăсене вуласа панă.

Вăрнар ен çыравçисем – Михаил Васильев, Вениамин Сорокин (Венсор-Яваш) – тĕлпулăва йĕркелекенсене тав сăмахĕ каланă.