Кăмăллă хыпар: «Август» компани «Раççейри чи лайăх 100 тавар – 2019» Пĕтĕм Раççейри конкурсăн дипломанчĕ пулса тăнă.

Дипломсене «Августăн» дача участокĕнче тата килти хушма хуçалăхра усă куракан икĕ препарачĕ тивĕçнĕ: колорадо нăррине пĕтерекен «Жукоед» инсектицид тата çĕрулми паранкисене колорадо нăрринчен тата проволочникрен хÿтĕлекен «Табу» протравитель.

Халĕ компани çак препаратсен тĕркемĕсем çине «100 лучших товаров России» текен паллăна лартма пултарать.

«Табу» тата «Жукоед» препаратсене Чăваш енри производство площадкинче – «Август» Фирмăн «Вăрнарти хутăш препаратсен завочĕ» филиалĕнче туса кăлараççĕ. 2019 çулта предприяти килти хушма хуçалăх валли ÿсентăрансене хими мелĕпе хÿтĕлекен препаратсене 2,3 пин тонна туса кăларнă. Ку виçĕмçулхипе танлаштарсан 21 процент пысăкрах. Заводăн производствăн 2019 çулхи пĕтĕмĕшле калăпăшĕ – 20,3 пин тонна.

Вăрнарта туса кăларакан хими препарачĕсемпе Раççейри аграрлă мĕнпур регионсем, çывăхри тата аякри ют çĕршывсем анлăн усă кураççĕ.

Людмила ИВАНОВА.