Чăваш енре муниципалитет йĕркеленĕвĕсен «100 çул марафонĕ» фестиваль иртет.

Çулталăкри тĕп пулăмсенчен пĕрне Чăваш автономи облаçне туса хунăранпа 100 çул çитнине халалланă. Марафон ĕнер Улатăрта старт илнĕ. Унăн тĕп тĕллевĕсен шутĕнче – районсемпе хуласен социаллă-экономика аталанăвĕн çитĕнĕвĕсене кăтартасси, халăха республика историйĕпе, Чăваш ен тата çĕршыв аталанăвне пысăк тÿпе хывнă паллă çынсемпе паллаштарасси.

Марафон çĕртме уйăхĕн 20-мĕшĕнче Республика кунне уявлакан тĕп лапамра, Хĕрлĕ Чутай районĕнче, вĕçленет. Унччен районтан района, хуларан хулана Чăваш автономи облаçĕн 100 çулхи символне çитерĕç. Çавăн пекех республика çыннисене Наци, Ÿнер музейĕсен, А.Г.Николаевăн Асăну комплексĕн куравĕсемпе паллаштарĕç, Чăвашкино фондĕнче упранакан чăвашла фильмсене кăтартĕç.