Авшак Элменте пурăнакан Татьяна Филипповна Ананьева хăнасене яланах тарават. Ăшпиллĕ, ырă кăмăллăскер, ачасемшĕн те тус вырăнĕнчех.

Ял хастарĕ Елена Муракова ертсе пынипе, акă, иртнĕ эрнере ял ачисем ушкăнпах ватă патĕнче пулнă. Тĕлпулăва ырă сăлтавпа та çыхăнтарнă – Татьяна Филипповна нумаях пулмасть 96 çул тултарнă.

Чей ĕçнĕ май ачасем фотоальбомсемпе кăсăкланса паллашнă, Татьяна Филипповна ачалăхĕ, çамрăклăхĕ, ун чухнехи вăйă-кулă çинчен каласа панине тимлесе итленĕ.

Тăхăр ытла теçеткене хыçа хăварнă çын – сывă пурнăç йĕркин çывăх тусĕ те. Çамрăксем вăл кунсерен зарядка тунинчен тĕлĕннĕ. Киле кайнă чухне çакна пĕр-пĕринпе савăнса сÿтсе явнă. Татьяна Филипповна тĕслĕхĕпе хăйсем те спортпа çывăхрах туслашассине пĕлтернĕ.