«Единая Россия» проекчĕсем республикăра пурăнакансен çивĕч ыйтăвĕсене татса параççĕ

Раççей Президенчĕ Владимир Путин хăйĕн Çырăвĕнче палăртнă пысăк тĕллевсем «Единая Россия» Чăваш енре пурнăçлакан проектсен координаторĕсен канашлăвĕнче сÿтсе явнă тĕп темăсенчен пĕри пулнă.

Президент хăйĕн Çырăвĕпе паллаштарнă хыççăнах йĕркеленĕ тĕлпулура Владимир Путин пуçарăвĕсене тĕплĕн сÿтсе явнă. Партин регионти уйрăмĕн секретарĕн заместителĕ Николай Владимиров палăртнă тăрăх, Çырура каланине пурнăçласа «Единая Россия» «Çĕнĕ шкул», «Сывă пуласлăх», «Хула хутлăхĕ» тата ытти проектсемпе те ĕçлесе пырĕ.

Вĕрентÿ учрежденийĕсен строительствин регионти тата муниципалитетсен шайĕнчи конкурсĕсене парти тата общество енчен тĕрĕслесе тăрассине, çав конкурссене тÿрĕ кăмăллă мар строительство организацийĕсем хутшăнассине пÿлмелли мерăсене вăйлатĕç. Сывлăх сыхлавĕн пуçламăш звенине модернизацилеме кăçалах хушма пысăк укçа – 550 миллиард тенкĕ – уйăраççĕ. «Единая Россия» врачсене пулăшас, отрасльти специалистсен йышне пысăклатас, саккунсене çĕнетес, медицина кадрĕсен дефицитне чакарас енĕпе те çине тăрса ĕçлĕ. Сăмахран, парти пулăшнипе «Земство тухтăрĕ» программăна хутшăнакансене уйрăм çынсен тупăшĕнчен илекен налукран хăтарнă.

Унсăр пуçне, çывăх вăхăтра парти халăх бюджечĕ çинчен калакан саккун проектне тишкерме тăратать. Унăн ăнăçлăхне Чăваш ен çирĕплетнĕ ĕнтĕ.

Кун йĕркинче ытти çивĕч ыйтусем те пур. Çав шутра – регионсен университечĕсене аталантарасси, вăл шутра бюджетлă вырăнсен шутне ÿстересси, вĕсен вĕрентÿ, тĕпчев майĕсене, социаллă инфратытăмне çирĕплетесси.

«Çырăвăн приоритечĕсен шутĕнче – çемье тата шкул, ача амăшĕпе ачалăха хÿтĕлесси», – тенĕ регионти политканаш çумĕнчи «Раççейшĕн кашни ача хаклă» ĕç ушкăнĕн ертÿçи Дмитрий Шепелев. Пĕрремĕш ача çуралсан тÿлекен амăшĕн капиталĕ 466 пин тенкĕпе танлашĕ. Иккĕмĕш ача çуралсан вăл тата 150 пин тенкĕ чухлĕ пысăкланать, виççĕмĕш ача çут тĕнчене килсен çемьене ипотекăна татмашкăн 450 пин тенкĕ параççĕ. Сахал тупăшлă çемьесенчи 3–7 çулсенчи ачасемшĕн уйăхсерен тÿлев пама тытăнĕç. 2020 çулта унăн виçи пурăнма кирлĕ виçен çуррипе танлашĕ (çĕршывра вăтамран 5,5 пин тенкĕ), 2021 çулта вара пурăнма кирлĕ виçе чухлĕ пулĕ.

Ачалăх пирки сăмах пуçарнă май, воспитани ыйтăвĕ пысăк пĕлтерĕшлĕ. Çавна май шкулта класс ертÿçисене уйăхсерен 5 пин тенкĕ хушма тÿлев пама пуçлаççĕ. «Единая Россия» çавăн пекех кĕçĕн классенчи шкул ачисене тÿлевсĕр вĕри апатпа тивĕçтерессипе те саккун кăларса çирĕплетĕ.

Президент лартнă тĕллевсем «Единая Россия» партишĕн стратеги шайĕнчи ĕçсем шутланаççĕ, вĕсене партин программа докуменчĕсене кĕртĕç. Владимир Путин Раççей халăхне упрасси, унăн йышне ÿстересси çинчен калани вара – партин чи пысăк тĕллевĕ.