Выльăх-чĕрлĕх отрасльне аталантарасси – аграрисен тĕп тĕллевĕсенчен пĕри. Районĕпе илсен кăçалхи кăрлач уйăхĕн 1-мĕшĕ тĕлне мăйракаллă шултра выльăх-чĕрлĕх 8134 пуç шутланнă, çав шутра – 3129 пуç ĕне.

Уйрăмах Вăрнарти аш-какай комбиначĕ район агропромышленность комплексне аталантарнă çĕре курăмлă тÿпе хывнине çирĕплетмелле. Агрохолдингра çак вăхăт тĕлне мăйракаллă шултра выльăх-чĕрлĕх 4504 пуç, çав шутра хушка пуçсем – 1731 пуç.

Çĕнĕ 2020 çул ăнăçлă пуçланнă. Кăрлачăн 1-мĕшĕнче тÿрех 17 пăру илнĕ. Аш-какай комбиначĕн Малтикас Ялтăрари выльăх-чĕрлĕх комплексĕн директорĕ Валентина Тимофеева каланă тăрăх, кунне вăтамран 5–6 ĕне пăрулать. Вăл нарăс тата пуш уйăхĕсенче йыш мĕнлерех хушăнасса та пĕлтерчĕ: пĕринче 146, тепринче 206 çамрăк выльăх кун çути курмалла иккен. Палăртма кăмăллă, предприятире иртнĕ çул пăру 1998 пуç е виçĕмçулхинчен 341 пуç ытларах илнĕ.

Аш-какай комбиначĕ кунсерен 31 тонна сĕт патшалăха сутать, чĕртавара Етĕрнери сĕт заводне вырнаçтараççĕ. Ĕне сĕчĕ чĕлхи çинче, теççĕ. Выльăх-чĕрлĕхĕн рационĕ пуян. Сенажĕ-силосĕ икĕ çуллăха та çитет. Комбикорм цехĕнче пахалăхлă апат хатĕрлеççĕ. Кунта икĕ оператор – Владимир Андреевпа Сергей Николаев – тăрăшаççĕ. Талăкне 25 тонна комбикорм хатĕрлеççĕ. Хутăш апат – кашни ÿсĕмри выльăх валли уйрăм.

Малтикас Ялтăрари выльăх-чĕрлĕх комплексĕнче пулнă май тата ытти хастар ĕçченпе те паллашма тÿр килчĕ. Вĕсем ирхи 5 сехет валлиех ĕçе килеççĕ. Çамрăксенчен пĕри – 21 çулти Виктория Михайлова. Аçăмçырми хĕрĕ, повар-кондитер специальноçне алла илнĕскер, пĕр шикленмесĕр фермăна ĕçлеме килнĕ, «ĕçрен ан хăра, вăл хăй санран хăратăр» тенине мĕн пĕчĕкренех асра тытса çитĕннĕ. Вика Михайлова пĕчĕк пăрусене пăхать. Шанса панă ĕçе тÿрĕ кăмăлпа пурнăçлать.

– Фермăра çиччĕмĕш уйăх тăрăшатăп, пĕчĕк пăрусене пăхма юрататăп. Çавăнпа та хамăн смена пуçланасса чăтăмсăррăн кĕтетĕп, – савăнăçлăн калаçрĕ Виктория Михайлова. – Тăрăшса ĕçленине хаклаççĕ, тивĕçлĕ шалу тÿлеççĕ.

Каласа хăвармалла, ĕнесене пăрулама илсе кайнă хыççăнах витере дезинфекци ирттереççĕ. Чĕрчунсен чирĕсемпе кĕрешекен районти станци пуçлăхĕ Владимир Матвеев комбинатăн Малтикас Ялтăрари комплексне çитсе курнă май выльăхсене лайăх условисенче тытнине палăртрĕ.

Ветеринарсем мăйракаллă выльăх-чĕрлĕх сывлăхĕшĕн хытă тăрăшаççĕ, вакцинаци вăхăтра тăваççĕ. Ятлă-сумлă ĕçченсенчен пĕри – Леонид Шулаев. Вăл тĕп ветврачра тăрăшать. Малтанах Кăмашри сысна комплексĕнче вăй хунă, Малтикас Ялтăрари фермăра улттăмĕш çул тимлет. Коллективра хисепре. Леонид Леонидович Вăрнарти ял хуçалăх техникумĕнчен вĕренсе тухнă. Пĕлĕве Хусанти ветеринари институтĕнче тарăнлатнă. Унăн мăшăрĕ те ял хуçалăх ĕçченĕ. Галина Николаевна Кăмашри сысна комплексĕнче тĕп зоотехникра тăрăшать. Шулаевсем виçĕ ача çитĕнтернĕ. Хĕрĕсем пурнăç çулĕ çине çирĕппĕн тăнă. Ывăлĕ анчахрах салтак аттине хывнă, çартан таврăннă. Каччă ялта тăрăшма хирĕç мар иккен.

Ĕç хастарĕсем – хуçалăх тĕрекĕ. Валентина Тимофеева директор маттур ĕçченсемпе тивĕçлипех мăнаçланать. Ырă ятрисем татах та пур. Вĕсем – Алена Петрова, Алина Петрова техник-осеменаторсем, Элеонора Федорова, Ираида Егорова, Альбина Семенова ветеринарсем, Людмила Васильева зоотехник-селекционер, Ирина Семенова учетчик тата ыттисем.

Елена ПОРФИРЬЕВА.