Росреестрăн Чăваш Республикинчи управленийĕ 2019 çулта пая кĕрсе хваттер туянас тесе килĕшÿ çырнисен шучĕ ÿснине пĕлтерет.

Статистика çакнашкал: 2019 çулта – 6223, 2018-мĕшĕнче 4456 пулнă. Управлени ертÿçи Екатерина Карпеева палăртнă тăрăх, ку пĕлтĕрхи июльтен строительствăна пая кĕрсе хутшăнни çинчен калакан федераллă саккуна улшăнусем кĕнипе çыхăннă.

Тĕп çĕнĕлĕх шутĕнче – эскроу- счетсемпе усă курни. Кун пек чухне пайçăсен укçи-тенки банкри ятарлă счет çине хывăнать, застройщик ăна нумай хваттерлĕ çурта хута ярсан кăна илме пултарать. Объекта вăл хăйĕн е кредит укçипе çĕклет. Çак схема – пая кĕрекенсене хÿтĕлемелли мелсенчен пĕри.

«Çакă пая кĕрекене ун укçи-тенкипе тĕллевлĕ усă курассине гарантилет, застройщика вара строительство ĕçĕсене хăвăртлатма хистет, – пĕлтерет Росреестрăн Чăваш енри управленийĕн пуçлăхĕ Екатерина Карпеева. – 2019 çулта Управлени эскроу-счетпа 1183 килĕшÿ çырнă».