Районсенче халăха социаллă контракт йĕркипе патшалăх пулăшăвĕ парас тĕллевпе ведомствăсем хушшинчи комиссисем ĕçлеме тытăннă.

Вăрнар районĕнче ун ларăвĕ пуçласа тунтикун иртнĕ. Унта çичĕ заявление пăхса тухса контрактсем çирĕплетнĕ. Ыйтса çыраканĕсем – икĕ е ытларах ача пĕччен çитĕнтерекен ашшĕ е амăшĕ, çула çитмен ачасене пĕччен воспитани паракан инвалидноç пур çын тата тăватă е ытларах ачаллă çемьесем.

Вăрнар районĕнче чухăнлăха социаллă контракт йĕркипе чакарас тĕллевпе 12,4 миллион тенкĕ уйăрнă. Пĕтĕмпе 126 контракт çырма палăртнă.

Патшалăх кÿрекен ку укçапа сахал тупăшлисем ĕç шырама е ĕçе вырнаçма, професси пĕлĕвне е хушма специальноç илнĕ вăхăтра стипенди вырăнне тÿлев илме, пурнăçăн йывăр лару-тăрăвĕнчен тухма пулăшакан ытти мероприятисене пурнăçлама усă кураççĕ. Çавăн пекех харпăр хăй ĕçне уçас текенсем пĕр хутчен 250 пин тенке тивĕçеççĕ.