Патшалăх чи малтанах хÿтлĕхсĕр граждансене социаллă пулăшу пама тивĕçлĕ. Ку тĕллевпе çĕршыв шайĕнче, регионсенче йышăннă саккунсем, программăсем ĕçлеççĕ. Вĕсене пурнăçлама тĕрлĕ шайри бюжетран пысăк укçа-тенкĕ уйăраççĕ.

Тимлĕхри ушкăнсенчен пĕри – тĕрлĕ сăлтавпа ашшĕ-амăшĕн ăшшисĕр юлнă тата тăлăх ачасем. Вĕсен прависемпе интересĕсене хÿтĕлесси хамăр районта та уйрăм шутра. Çав вăхăтрах чи кăткăс та пĕлтерĕшлĕ ыйтусем йышне вĕсене хăтлă çурт-йĕрпе тивĕçтерессине кĕртмелле. Чăваш Республикин «Çурт-йĕр хутшăнăвĕсене йĕркелесси» саккуна пурнăçласа ку ĕç малалла пырать. Район администрацийĕн пресс-службин информацийĕ тăрăх, тăлăх ачасене хваттерпе е çуртпа тивĕçтерме республика бюджетĕнчен 3,8 млн тенкĕ уйăрнă. Палăртнă тăрăх, кăçал ку ушкăнран çиччĕн тинех хăйсен кĕтесĕллĕ пулмалла. Пĕлтĕрхи декабрĕн 31-мĕшĕ тĕлне çурт-йĕр условийĕсене лайăхлатма черетре 72 тăлăх тăнă.

Сăмах май, вĕсенчен хăшĕ-пĕри иртнĕ уйăх вĕçĕнче поселокри Советски урамĕнчи тата Зеленый тăкăрлăкри вĕр çĕнĕ хваттерсен телейлĕ хуçисем пулса тăнă. Уççисене вĕсене район администрацийĕн пуçлăхĕ Леонид Николаев, строительство тата çурт-йĕрпе коммуналлă хуçалăх пайĕн тĕп специалист-эксперчĕ Анна Артемьева, «Вурнарская» МСО» организацин ертÿлĕхĕ савăнăçлă лару-тăрура панă.

Район администрацийĕн пуçлăхĕ çамрăксене патшалăх пулăшнипе хăйсен хваттерĕллĕ пулнă ятпа саламланă, унта телейлĕ те ăнăçлă пурăнма суннă. Çĕнĕ çурт-йĕр хуçисем те савăнăçне, тулли кăмăлне пытарман, пурне те чунтан тав тунă.

Палăртмалла, ашшĕ-амăшĕн хÿттисĕр юлнисене уйăрнă хваттерсем хăтлă та çутă, уйрăммăн хутса ăшăтаканскерсем, шалти отделкăпа – хăть çав вăхăтрах пурăнма кĕр.

Ирина ЯКОВЛЕВА.

Чăваш Республикин Цифра аталанăвĕпе информаци политикин тата массăллă коммуникацисен министерстви пулăшнипе пичетленнĕ.