Почта çыхăнăвĕ нумай ĕмĕр çынсене пĕр-пĕринпе хутшăнма май паракан чи меллĕ те шанчăклă çыхăну хатĕрĕ шутланать. Кунта тимлекенсем паян – çемьесене тĕрлĕ тивĕçтерÿсемпе пулăшакансем те.

Енĕшри почта çыхăнăвĕн уйрăмĕнче маларахрах пулнăччĕ. Почтальонсем шăпах çула тухма хатĕрленнĕччĕ – хаçат-журнала вулакан патне çитерессишĕн васкакансене ÿкерсе те илнĕччĕ.

Коллектив пирки халĕ сăмах пуçарма шăпах вăхăт. 2020 çулхи иккĕмĕш çур çул валли хаçат-журнал çырăнтарас тапхăр пынă май, енĕшсем «Çĕнтерÿ çулне» халăхра сарассипе кăтартуллă ĕçлекенсен шутĕнче. Енĕшри почта çыхăнăвĕн уйрăмĕ Уйкас Кипекре вырнаçнă. Вăл пилĕк ял халăхне пĕрлештерет. «Хальхи вăхăтра, тĕнчипех хăрушă чир хуçаланнă тапхăрта, паллах, çынсемпе тачă хутшăнса ĕçлесси йывăрланчĕ. Анчах та вĕсем пире ăнланни алăсене лăнч усма памасть. Çитменнине, паян информаци технологийĕсем вăйлă аталаннă та – ял çыннисем вăл е ку тивĕçтерĕве илме телефонпа шăнкăравласа тухаççĕ. Вăл шутра – хаçат çырăнассипе те», – пĕлтерчĕ почта уйрăмĕн пуçлăхĕ Антонина Кудрявцева.

Вăл кунта 23-мĕш çул тимлет: малтан почтальонкăра, халĕ 20-мĕш çул ĕнтĕ – пуçлăхра. Йăрă та вăр-варскер пур çĕре те ĕлкĕрет, ĕçрен пушă вăхăтра тренировкăсенче пиçĕхет. Чупассипе, йĕлтĕр спортĕнче Вăрнар почтамчĕн чысне республикăра та ăнăçлă хÿтĕлет.

Коллектива хăй пекех хастар çынсем чăмăртаннă. Роза Архипова – чи пысăк стажли. Ырă кăмăллă та ĕçчен хĕрарăм Вăрман Кипек тата Кивçурт Енĕш ялĕсенче пурăнакансем патне пичет изданийĕсем, тĕрлĕ тавар, пенсисем çитерет. «Çĕнтерÿ çулне» ку тăрăхра чи нумай çырăнтараканни. Ялта пулнă май, тепĕр чухне куратăп та ăна – хаçат-журналсене килĕрен вĕçсе тенĕ пек валеçсе тухнинчен тĕлĕнетĕп. Çивĕч пулнишĕн, ăшшăн калаçнишĕн хисеплет те ăна ял-йыш.

Зоя Никитина, Кивçурт Енĕшре çуралса ÿснĕ, халĕ Енĕшре пурăнаканскер, çамрăк чухне Калерия Игнатьева почтальонкăна открытка-çырусем, хаçат-журнал валеçме пулăшнă вăхăтра çулсем иртсен хăй те почтальонка пуласса шутламан та. Тăватă çул ĕнтĕ вăл Енĕш тата Услантăр Енĕш халăхĕпе килĕштерсе ĕçлет. Плансене пурнăçласа пырать.

Алексей Ивановшăн почтăри ĕç иккĕмĕш çырăнтару тапхăрĕпе танлашать. Каччă хаçат-журналпа тăван ялĕнчи, Уйкас Кипекри, çынсене туслаштарать. «Çамрăк пулин те ĕçе пĕлет, хăвăрт вĕренет, тĕплĕ тăвать», – терĕ ун пирки пуçлăх.

– Пирĕн тăрăхра учительсем пурте «Çĕнтерÿ çулне» илсе тăраççĕ. Шкул директорĕ Анна Петровна Андреева, акă, хаçата шкул валли те, киле валли те çырăнать. Ку сферăра тимлесе тивĕçлĕ канăва тухнисем те «Çĕнтерÿ çулĕпе» чылай çул туслă, – пĕлтерчĕ Антонина Кудрявцева. – Чăвашсене çутта кăлараканĕ Иван Яковлевич Яковлев: «Хаçат ырра вĕрентет», – тесе ахальтен каламан ĕнтĕ. Ман шутпа, районта пурăнакан кашни çыннăн килĕнче район хаçачĕ пулмаллах. Çитменнине, вăл пурнăçа тĕрлĕ енлĕ çутатать, çĕнĕлĕхсемпе паллаштарсах тăрать...»

Хальлĕхе район хаçатне чи нумай çырăнтаракансем çавăн пекех – Вăрнарти, Ершепуçĕнчи, Калининăри, Кĕçĕн Кипекри, Çĕрпелти почта çыхăнăвĕн уйрăмĕсем. Ыттисем те вĕсене çитме хавхаланса ĕçлеççĕ.

Светлана ЧИКМЯКОВА.