Хăвăрт тата пахалăхлă. Кусем – Вăрнар строителĕсен ĕç-хĕлне туллин те тивĕçлĕн хаклакан енсем

Вĕсем çĕкленĕ çуртсене пула Вăрнар поселокĕн сăнĕ-сăпачĕ чăннипех те хитреленсе улшăнчĕ. Зеленăй – Севернăй тăкăрлăксем чаплă, хуларинчен пĕртте кая мар хăтлă микрорайона çаврăнчĕç. Çĕршер çын вĕсем çĕкленĕ хваттерсенче пурăннишĕн савăнать.

Чăн та, юлашки çулсенче хуçалăхсем хушшинчи «Вурнарская» организаци нумай хваттерлĕ çурт-йĕр тăвассипе самай малалла утăмларĕ. Строительствăри çĕнĕлĕхсене алла илни, эффективлăха ÿстерсе пыни вĕсене ÿсĕмлĕ ĕçлеме май парать те.

Юлашки пилĕк çулта кăна ку застройщик нумай хваттерлĕ вуникĕ çурт хăпартса лартрĕ. Пĕтĕмĕшле лаптăкĕ 19 пин те 687 тăваткал метр. Иртнĕ çул кăна поселокри чи хăтлă микрорайонти – Зеленăй тăкăрлăкра – 40 хваттерлĕ çуртра çемьесем çĕн кĕтес çавăрчĕç. Ку вырăн, поселокра пурăнакансем пĕлеççĕ ĕнтĕ, унччен сăнĕпе тавралăха чăннипех те пăсатчĕ, йывăç-тĕмсемпе, хыт-хурапа хупланса ларнăччĕ.

Кăçал июльте МСО строителĕсене пула тата тепĕр вырăн илемленчĕ. Ленин урамĕнче, типографи çумĕнчи лаптăкра, никĕс таран кăна çĕкленнĕ объект мĕскĕннĕн курăнатчĕ. Кĕçех кунта хваттерсем туяннисем çĕн пÿрт уявĕн кĕрекине ларĕç.

Çĕнĕ çурт кашнинех илĕртет. Уйрăмах социаллă программăсене лекнисем тин хута янă хваттерсемшĕн савăнаççĕ. Маларах «Вурнарская» МСО строителĕсем çĕрĕшнĕ çурт-йĕртен куçакан çынсем валли умлă-хыçлă икĕ çурт хăпартрĕç. Пĕлтĕр, ав, тăлăх ачасене найм килĕшĕвĕпе тăватă хваттер уйăрса пачĕç.

Хальхи вăхăтра строительсем Хурăнсур Çармăсри Раççей Геройĕ Федор Васильевич Кузьмин ячĕллĕ культурăпа сывлăх центрĕнче тăрăшаççĕ. Реконструкци ĕçĕсене пурнăçлама шăпах «Вурнарская» МСО тивĕçнĕшĕн ку ял çыннисем питех савăннă.

Сăмах май, ку объект вырăнти клуб ертÿçин Михаил Кузьминăн пуçарăвĕпе çĕнелет. Ун проекчĕ пуçаруллă бюджет программине кĕнĕ. Михаил Григорьевич каланă тăрăх, укçан пысăк пайне вăл хăй хывнă.

Строительсем канма пĕлмесĕр тенĕ пек шалти ĕçсене пурнăçлаççĕ. Стенасем лаптăк хыççăн лаптăк якалса, илемленсе пыраççĕ. Организацире каменщиксен çеç мар, штукатур-малярсен те ăста ушкăнĕ чăмăртаннă.

Сăмах май, унччен пуçланă реконструкци ĕçĕсене вĕçлесен хурăнсур-çармăссен канăвне туллин йĕркелемелли вырăн пулĕ. «МСО коллективĕ çав тери тимлĕ ĕçлет, чун савăнать. Анчах та пăшăрхантаркан пулăм та пур: ăшă системи, çутă тума укçа-тенкĕ çитмест», – строительсене мухтанипе пĕрлех чун ыратăвне те пĕлтерчĕ Михаил Кузьмин.

«Вурнарская» МСО строителĕсен ĕçне пысăк хак пани ахальтен мар. Вĕсем – районти ку тытăмĕн лидерĕсем. Чăваш Республикин тава тивĕçлĕ строителĕ Иван Александрович Сандомиров ертсе пыракан общество чăн-чăн специалистсенчен тăрать. Çамрăксене вĕрентсе пырасси йăлана кĕнĕ. Нумай çул тăрăшса, кăтартуллă ĕçлекенсене хавхалантарасси йăлара. Коллективра тăракансенчен ытларахăшĕн тĕрлĕ шайри наградăсем пур.

– Кăçал Татьяна Васильева штукатур Чăваш Республикин строительствăпа архитектура тата пурăнмалли çурт-йĕрпе коммуналлă хуçалăх министерствин Хисеп грамотипе, Сергей Гребенюк стропальщик, Александр Андреев водитель, Андрей Скворцов каменщик, Владимир Васильев тракторист «Строительствăри тава тивĕçлĕ ĕçсемшĕн» паллăна тивĕçнĕ, – пĕлтерчĕ директорăн заместителĕ Юрий Сандомиров.  

Вăрнар строителĕсем – район хаçачĕн тусĕсем те. МСО ертÿлĕхĕ хăйĕн ĕçченĕсене «Çĕнтерÿ çулне» тăтăшах çырăнса парать. Коллектива аталану çулĕпе утма сунатпăр. Ăнăçăвĕ хăйсем çĕкленĕ çуртсем пекех ÿссе те ÿссе пытăр.

Светлана ЧИКМЯКОВА.