Вĕренÿрен пушă вăхăт нумай чухне ачасене усăллă ĕçсене ытларах явăçтармалла. Илемлĕ литературăпа паллаштармалла, ăс-тăна çивĕчлетекен вăйăсемпе, спортпа кăсăклантармалла. Унсăрăн вĕсем сиенлĕ йăласемпе те часах туслашĕç. Уйрăмах – аслисем енчен тĕрĕслев пулмасан.

Çамрăксене пуринчен ытла «илĕртекен» сиенлĕ япаласенчен пĕри – сигарет. Аслисене пăхса-ши, юраманнине тутанса курас тесе-ши, хăшĕ-пĕри шкул çулĕсенчех чĕлĕме вăрттăн мăкăрлантарма тытăнать. Çакă вара тин вăй илсе пыракан организмшăн çав тери хăрушă. Кайран çак муртан хăтăлайманнипе кăна мар, хăйĕн сывлăхне çамрăклах хавшатнипе, çавна май пурнăçне кĕскетнипе те. Ачасене усал йăларан сыхлас тесен, ашшĕ-амăшне вĕсемпе никотинăн аркатуллă витĕмĕ пирки пĕрмаях калаçма сĕнетпĕр.

Сигарет туртни çамрăкăн чĕрепе юн тытăмне тата сывлав органĕсене самаях тертлентерет. Енчен те ача кĕçĕн классенчех табакпа «паллашнă»-тăк, 12–13 çулсем тĕлне унăн сывлавĕ йывăрланать, чĕре таппи пăсăлать. Сăмахран, çулталăк çурă кăна туртакан çамрăкăн та сывлăх улшăнăвĕсем тÿрех сисĕнеççĕ. Вĕсем час-часах хăйсене япăх туяççĕ% ÿслĕк аптратать, сывлăш çитмест, вăй çук. Кунашкаллисем тăтăш шăнса пăсăлни, респираторлă тата вируслă чирсемпе, вар-хырăм ыратнипе хăшкăлни те сайра мар. Тата вăраха кайнă бронхит пĕрмаях нушалантарни те пулать. Никотин тата сигаретри ытти наркăмăшсем çамрăксен пуç мимине те ытти органсенчен кая мар сиенлеççĕ. Ача мĕн чухлĕ пĕчĕкрех, сиенĕ çавăн чухлĕ пысăкрах. Никотин витĕмĕпе пуçри юн çаврăнăшĕ пăсăлать, çавна май унăн ĕçĕ те хавшать. Табак туртакан шкул ачисене вĕренме йывăр% тимлĕхĕ çук, астăвăм шайĕ те пĕчĕк, шухăшлавĕ ансат, хусканăвĕсем те кăнттам. Кунсăр пуçне вĕсем часах ывăнаççĕ, вĕренÿре тантăшĕсемпе тан ĕлкĕреймеççĕ.

Нерв системи аталанса çитейменнине кура, никотина иленни çамрăксен хăвăрт пуçланать. Аслă çулсенче вара, тем пек тăрăшсан та, ку амакран хăтăлма питĕ кăткăс. Çакна ашшĕ-амăшĕн ачисене ăнлантарма тăрăшмаллах.

Чăваш енри Гигиенăпа эпидемиологи центрĕ.

Чăваш Республикин Цифра аталанăвĕпе информаци политикин тата массăллă коммуникацисен министерстви пулăшнипе пичетленнĕ.