Вăрнарти 1-мĕш вăтам шкулта вĕренекен, ача-пăча пултарулăх çурчĕн «Хаваслă сăрăсем» пĕрлешĕвĕн воспитанникĕ Дмитрий Афанасьев Пĕтĕм Раççейри «Çĕнтерÿ çуначĕсем» конкурсăн çĕнтерÿçиссен йышне кĕнине çырнăччĕ.

Иртнĕ шăматкун пултаруллă каччă ашшĕ-амăшĕпе – Ираида Исааковнапа тата Валерий Павловичпа– пĕрле Мускав облаçĕнчи Монино хула поселенийĕнче вырнаçнă Сывлăш-çар Вăйĕсен Тĕп музейĕнче пулнă чыслава хутшăннă. Диплома, парнене тата музейра курса çÿреме сертификата тивĕçнĕ.

– Мускавра пулни хавхалану кÿчĕ, çĕнĕ çынсемпе паллашрăм, туссем тупрăм, – пĕлтерчĕ арçын ача.

Çĕнтерÿçĕсене Мускав облаçĕн сумлă çыннисем, çамрăк артистсем саламланă. Пĕрле сăн ÿкерĕннĕ хыççăн конкурсантсем тÿпене асăнупа шанчăклăх символне – хутран ăсталанă самолетсене – вĕçтернĕ.

Дима Мускавран килсенех çемйипе пĕрле кукамăшĕ патне вĕçтернĕ.

– Яланах маттур пул, малта пыр, – суннă ăна Çăкаллă Явăшра пурăнакан Нина Прокопьевна Афанасьева.

Пĕтĕм Раççейри «Çĕнтерÿ çуначĕсем» конкурсра 74 регионти çамрăк художниксен 279 ĕçĕ тупăшнă. Çавăн пекех ÿкерчĕксене Францирен, Чехирен, Казахстанран та ярса панă.

Светлана ЧИКМЯКОВА.

Чăваш Республикин Цифра аталанăвĕпе информаци политикин тата массăллă коммуникацисен министерстви пулăшнипе пичетленнĕ.