Христианинсем ĕнер, çурла уйăхĕн 14-мĕшĕнче, Пыл Сăпасне уявларĕç. Пыл илсе сăвапласа çирĕç. Пĕрремĕш Сăпас – çуллана ăсатни те.

Çак çимĕç питĕ сиплĕ. Унпа ĕлĕкренех тĕрлĕ чир-чĕртен хÿтĕленме усă курнă. Асăрхăр% пылра организма çирĕплетекен 300 яхăн усăллă япала.

Вĕлле хурчĕ питĕ тăрăшуллă. Ахальтен мар маттуррисене «пыл хурчĕ пек ĕçчен», теççĕ. Ырми-канми тăрăшакан хурт-кăпшанка халалласа сахал мар хайлавсем çырнă. Акă, чăвашсен паллă поэчĕ, драматургĕ Федор Павлов «Вĕлле хурчĕ – ылтăн хурт» ятлă сăвă та шăрçаланă. Литературăра тата ытти тĕслĕхе илме кăтартма пулать.

Пыл хурчĕсем 80 процента яхăн ял хуçалăх ÿсен-тăранне, нумай çул ÿсекен курăксене шăркалантараççĕ, тăван тавралăха упраса хăварма пулăшаççĕ. Çавăнпа та этемĕн çак хурт-кăпшанка хаклама пĕлмелле. Вĕлле хурчĕсем пĕтсен ÿсен-тăрана шăркалантаракан юлмасть, вара вăрлăх та пулмасть. Этемĕн те, выльăх-чĕрлĕхĕн те апат рационĕ самаях чухăнланĕ.

Пыл хурчĕсемсĕр пурнăç çук. Çакна кашнин асра тытасчĕ.

Николай ВАСИЛЬЕВ.