Районта пурăнакансем-ĕçлекенсем «Ачалăх ячĕпе, ачалăхшăн» ыркăмăллăх марафонне çулсеренех хутшăнаççĕ. Кăçал та çаплах.

Ун çÿпçи уйрăмах предприяти-организацисенче тимлекенсен уçă кăмăлĕпе тулать. Чи хастаррисем – «Август» Фирмăн «Вăрнарти хутăш препаратсен завочĕ» филиалĕ, «Звездопад» АХО, «Энергостроймонтаж» ТМЯО, «Вурнарская» МСО АО, «Чувашкабельмет», Вăрнарти 1-мĕшпе 2-мĕш, Аçăмçырминчи, Калининăри, Хапăсри, Кĕçĕн Кипекри шкулсем. Пĕтĕмĕшле 273 пин тенкĕ пухнă.

Кăçал та унăн пĕр пайне пурнăçăн йывăр лару-тăрăвне лекнĕ ачасене шкула хатĕрлеме ярĕç. 132 пин те 380 тенке шкул хатĕрĕсемпе рюкзаксем туянма уйăрнă. Вĕсене профилактика учечĕнче тăракан 15 тата сахал тупăшлă çемьесенчи 51 ачана парĕç.

Марафон йĕркипе пухăннă ытти укçа-тенкĕпе хевтесĕр ачасем валли оборудовани тата шкул çулĕчченхи учрежденисем валли теттесем туянма палăртнă.