Виçĕмкун Чăваш ен Тĕп суйлав комиссийĕ Чăваш Республикин Пуçлăхĕн суйлавĕн тата вырăнти хăйтытăмлăх органĕсен депутачĕсен суйлавĕн йĕркине çирĕплетнĕ.

Лару видеоконференцçыхăну мелĕпе иртнĕ. ЦИК членĕсем республикăра сасăлав виçĕ куна пырассине йышăннă: сентябрĕн 11–12-мĕшĕсенче – малтанхи, сентябрĕн 13-мĕшĕнче тĕп сасăлав кунĕсем.

Республика ЦИК-ĕн председателĕ Александр Цветков çакă коронавирус инфекцийĕн пандемийĕ тăсăлнине кура халăх сывлăхĕн хăрушсăрлăхне тивĕçтерессипе çыхăннине палăртнă.

Çынсен унчченхи пекех сасăлав пÿлĕмĕнче, заявлени тăрăх килте сасăлама май пулĕ. Çавăн пекех ялсене тухса сасăлаттарас форма та ĕçлĕ. Кил территорийĕсенчи сасăлава пăрахăçланă.

Чăваш ен çыннисен, Пĕрлехи сасăлав кунĕнче Мускавра пулакансен, Чăваш Республикин Пуçлăхĕн суйлавне хутшăнма май пулĕ. Çак кун тĕп хулара 30 цифра участокĕ ĕçлĕ. Анчах çакăн валли маларах Патшалăх тивĕçтерĕвĕсен пĕрлехи порталĕ тата территорири суйлав комиссийĕ урлă заявлени çырса çав участоксем çумне çирĕпленмелле.

Светлана ЧИКМЯКОВА.