Иртнĕ эрнекун районти çул çинче синкерлĕ тĕслĕх çырăннă. Чăваш енри ГИБДД Управленийĕн информацийĕ тăрăх, авари «Никольски–Етĕрне–Калинино» автоçулăн пирĕн районти участокĕнче пулнă. Çав тери пысăк çухату – 37-ри çамрăк хĕрарăмăн пурнăçĕ сарăмсăр татăлнă.

«Ку инкек 12 сехет иртсен пулни паллă. Малтанхи тĕрĕслев кăтартнă тăрăх, «Киа-Спектра» машинăн водителĕ хирĕç çул çине тухнă. Çавна май ВАЗ-21110 автомобиль çине кĕрсе кайнă. «Калина» водителĕ, хамăр район хĕрарăмĕ, çапăнасран хăтăлас тесе кюветалла пăрăннă. Анчах ĕлкĕреймен – ăна шăпах хăй ларнă енчен хытах лекнĕ. Çамрăк хĕрарăм хăрушă инкек вырăнĕнчех вилсе кайнă. Тепĕр машинăн водителĕпе 51-ри пассажирне районти больницăра медицина пулăшăвĕ кÿнĕ. ГИБДД сотрудникĕсен шухăшĕпе, иномарка водителĕ çанталăк условийĕсене, çумăр çунине, кура тивĕçлĕ хăвăртлăха тытса пыман. Кунсăр пуçне машинăн резина тĕсĕсем тĕрлĕрен пулнă – çул-йĕр правилисемпе килĕшÿллĕн кунашкал çÿреме юрамасть. Чăваш енри ГИБДД Управленийĕн даннăйĕсем тăрăх, «Киа» водителĕ çул-йĕр правилисене пăснине кăçал 5 хутчен регистрациленĕ. Пурте – хăвăртлăха палăртнинчен ÿстернĕшĕн. Ку инкеклĕ тĕслĕх тĕлĕшпе уголовлă ĕç пуçарнă», – пĕлтерет Чăваш енри Шалти ĕçсен министерствин пресс-служби.