Çĕршывра миçе çемье, ашшĕ е амăшĕ хăш çĕрте ачасене пĕччен ÿстерет? Аслашшĕ-асламăшĕсемпе пĕрле пурăнакан темиçе ăруллă çемьесем миçе? Çакнашкал кăтартусене халăх çыравĕнчен кăна пĕлме пулать.

2010 çулхи халăх çыравĕн пĕтĕмлетĕвĕсем тăрăх, 16 çултан аслăраххисем çĕршывра 119,7 миллион çын пулнă. Вĕсенчен 65,5 миллионĕ – хĕрарăмсем, 54,2 миллионĕ арçынсем. Ун чухне официаллă майпа мăшăрланнă 33,2 миллион арçын тата 33,3 миллион хĕрарăм шутланнă. 13,2 миллион арçын тата 10,8 миллион хĕрарăм нихăçан та мăшăрланман тесе пĕлтернĕ. Официаллă майпа уйрăлнисем 4 миллион, уйрăм пурăнакансем 7,6 миллион çын пулнă.

2021 çулхи апрельте иртекен çитес халăх çыравĕн листисенче мăшăрсене ултă категорипе пăхса тухаççĕ% мăшăрланнине регистрацилени; çырăнман мăшăрсем; официаллă майпа уйрăлни (уйрăлнине регистрацилени); уйрăм пурăнни; мăшăрĕ вилни; нихăçан та мăшăрланманни.

Хутшăнусене регистрациленĕ мăшăрсен шучĕ чакса пырать пулин те, пурпĕр ытларахăшĕ официаллă майпа çырăнаççĕ. 2010 çулхи çырав пĕтĕмлетĕвĕсем тăрăх, 33 миллион мăшăр шутланнă. Вĕсенчен 4,4 миллионĕ е 13 проценчĕ хут уйăрттарман.

Патшалăхăн социаллă пулăшăвĕсене, çăмăллăхсен калăпăшне çыравсен кăтартăвĕсем тăрăх палăртаççĕ. Тĕслĕхрен, çемьесене ача амăшĕн капиталне парса пулăшасси 2002 çулхи çырав хыççăн вăя кĕнĕ.

Чăваш Республикинче 2010 çулхи халăх çыравĕ тăрăх, 16 çултан аслăраххисем çемьеленнĕ тата çемьеленмен 579 пин çын пурăннă. Мăшăрлă хĕрарăмсем авланнă арçынсенчен 3 пин енне ытларах пулни те палăрнă. Çавăн пекех, çырав пĕтĕмлетĕвĕсем тăрăх, регионта 288 пин мăшăр пурăнать. Вĕсенчен хут уйăрттарманнисем 32 пин е 11 процент.

Малтан Пĕтĕм Раççейри халăх çыравне 2020 çулхи октябрĕн 1–30-мĕшĕсенче ирттерме палăртнăччĕ. Анчах, çĕршыври лару-тăрăва тĕпе хурса, Раççей статистики ăна 2021 çула куçарма сĕннĕ. Раççей правительствин председателĕ Михаил Мишустин çырава 2021 çулхи апрелĕн 1-мĕшĕнчен пуçласа 30-мĕшĕччен ирттерме палăртса постановлени кăларнă.