Вăрнар районĕнче ĕçлĕ визитпа Чăваш Республикин промышленность тата энергетика министрĕн тивĕçĕсене пурнăçлакан Сергей Лекарев пулчĕ.

Малтанах вăл район администрацийĕн пуçлăхĕпе Леонид Николаевпа тĕл пулса отрасль аталанăвĕн çивĕч ыйтăвĕсене сÿтсе явнă. Хыççăн «Август» Фирмăн «Вăрнарти хутăш препаратсен завочĕ» филиалне çитнĕ. Предприяти ĕçĕ-хĕлĕпе тĕп инженер Игорь Сапожников паллаштарнă.

Вăрнар районĕнче промышленность продукцийĕн пĕтĕмĕшле калăпăшĕн 80 проценчĕ – заводăн тÿпи. Кунта паян 100 ытла тĕслĕ пестицид туса кăлараççĕ. Ултă производство цехĕ ĕçлет, вăл шутра килти хуçалăхсем валли ÿсентăрансене хими мелĕпе хÿтĕлекен препаратсем кăларакан тата гербицидсен цехĕсем.

Кăçалхи пĕрремĕш çур çулта завод производствăна ÿстерчĕ: 13 пин тонна продукци кăларнă. Ку пĕлтĕрхи танлаштаруллă тапхăртан 40 процент ытларах.

Министр тивĕçĕсене пурнăçлакан Сергей Лекарев малтанах полимерлă тарăсен производствин цехне çитсе курнă. Ултă уйăхра кунта полимерлă тарăсемпе хупăсене 11 млн штук туса кăларнă.

Сергей Лекарев çавăн пекех логистика службин, наукăпа производство центрĕн ĕçĕ-хĕлĕпе паллашнă. «Заводри производство пысăк технологиллĕ оборудованисене пĕрлештернĕ, пахалăх асăрхавне, предприятие ертсе пырассине тата склад логистикине çÿллĕ шайра йĕркеленĕ. Кунти çав тери лайăх практикăна регионта кăна мар, пĕтĕм Раççейĕпе сарма пулать. Районăн малалла ăнăçлă аталанма пысăк майсем пур», – тенĕ Сергей Лекарев.

Завод ертÿлĕхĕпе вăл «Август» компанин Вăрнарти хутăш препаратсен завочĕн аталанăвĕпе модернизацие хывма палăртнă инвестици планĕсене те сÿтсе явнă.

Людмила ИВАНОВА.