Пирĕн, Вăрнарти Ашмаров урамĕнчи 8-мĕш çуртра пурăнакансен, савăнăçĕ чăннипех те вĕçĕ-хĕррисĕр. Урам енчен иккĕмĕш çул чечексем ешереççĕ. Кăçал подъезда кĕмелли, çурт умĕнчи çулсем асфальтпа витĕнчĕç.

Подряд организацийĕн – «ВиКа» тулли мар яваплă обществăн ĕçченĕсем (ертÿçи Владимир Иванов) яваплăха туйса тимлерĕç, асфальт пахалăхлă вырттăр тата нумай çула чăттăр тесе тăрăшрĕç. Подъезд умĕнчи лаптăкра саксем лартмалли вырăнсене те йĕркелесе пачĕç.

Çак ĕçсене пурнăçа кĕртме пулăшнăшăн район администрацийĕн пуçлăхне Леонид Николаева, строительствăпа коммуналлă хуçалăх пайĕн пуçлăхне Анатолий Иванова, Вăрнар хула поселенийĕн администрацийĕн пуçлăхне Алексей Владимирова, çуртра пурăнакансене, уйрăмах Владимир Васильева, Денис Сидорова, Владимир Прокопьева питĕ пысăк тав.

Строительсем нумай хваттерлĕ çуртсен территорине хăтлăх кĕртес программăпа Вăрнарти Советски урамĕнче те чунтан тимлеççĕ.

Анчах та «Экоцентр» машинине çуртăн килкарти енĕпе çÿреме ирĕк парас марччĕ. Вĕсем йывăрăшне кура çула, шыв юхмалли пăрăха (ливневкăна) аркатса пĕтерме пултараççĕ.

Нина ФИРСОВА.