Ĕç тăвакан влаç органĕсен тата муниципалитетсен ертÿçисемпе ирттернĕ канашлăва ЧР Пуçлăхĕ Олег Николаев кăмăлсăрринчен пуçланă – коронавирусран сыхланмалли вакцинаци кăтартăвĕсем япăх...

«Инфекципе çыхăннă çивĕчлĕх ниçта та кайса кĕмен, – тенĕ Олег Николаев. – Тăнăç лару-тăру пулин те вăхăтран кăна килекен ыйту пур – вирусăн Инди тата Африка штамĕсем пирĕн пата çитесси. Вĕсем вара 5–6 хут хăвăртрах сарăлаççĕ, çав штамсемпе кĕрешесси чылай кăткăсрах...»

Паянхи лару-тăрура сыхлăхăн шанчăклă пĕртен-пĕр мери – вакцинаци. Анчах шăпах çак енĕпе ĕçлесе çитерейменни палăрать. Куншăн Олег Алексеевич вырăнсенчи администрацисен пуçлăхĕсене, должноçри çынсене пайăррăн тиркенĕ – халăха прививка тума сĕнес-хистес енĕпе вĕсен енчен хастарлăх палăрмасть. Сăмах май, регион ертÿçи хăй кану кунĕсенче вакцинăн иккĕмĕш компоненчĕпе укол тутарнă. «Хама лайăх туятăп. Пĕрремĕш компонентпа укол тунине те йĕркеллĕ тÿссе ирттернĕччĕ, ку хутĕнче те çаплах», – тенĕ ЧР Пуçлăхĕ.

Унăн пăшăрханăвĕ сăлтавсăр пулманнине сывлăх сыхлавĕн министрĕ Владимир Степанов цифрăсемпе çирĕплетнĕ. Тунтикун тĕлне республика 113 пин прививка тумалăх вакцина илнĕ. Пĕрремĕш компонентпа хальлĕхе 92 пин çын укол тутарнă – планпа пăхнин 15: чухлĕ. Раççей шайĕнчи вăтам кăтарту – 19: . Иккĕмĕш компонентпа укол тутарнисен йышĕ регионта хальлĕхе 11,5: танлашать. Вирусăн хăрушăрах Британи штамне Чăваш енре тупнă ĕнтĕ, министр шучĕпе, халăх миграцине кура Инди тата Кăнтăр Африка штамĕсем те региона çитеççех. Вĕсен хăрушлăхĕ чылай пысăкрах: çын инфекцие тÿссе ирттересси те йывăртарах, чир вилĕм патне илсе çитернĕ тĕслĕх те нумайрах.

Вакцинаци чиртен сыхланмалли шанчăклă мел пулнине кура министр вырăнсенчи влаçсене хастартарах позици йышăнма чĕнсе каланă. Ку ĕç-пуç пĕлтĕрхи пек çăмăл мар чару мерисем йышăнмалла пуласран сыхланма кирлĕ. Кĕçех ярмăрккасем пуçланаççĕ, халăх йышлă хутшăнакан ытти мероприяти пулать – çак лару-тăрура сыхлăх мерисем пушшех пысăк пĕлтерĕшлĕ.