Калининăри психикăпа неврологи интернатĕнче Социаллă ĕçченĕн тата Медицина ĕçченĕн кунĕсене халалласа уяв иртнĕ.

Пĕлтĕртенпе интернат хупă йĕркепе ĕçлерĕ. Нумаях пулмасть кăна, кунта сипленекенсем тата ĕçлекенсем пурте тенĕ пекех вакцинаци тунă пирки е хăшĕсен чире пула антителасем йĕркеленсен, коронавирусченхи пек хăнăхнă майпа тимлеме ирĕк панă. Çавăнпа та кăткăс тапхăр хыççăн пĕтĕм коллективпа пухăнса ирттернĕ пĕрремĕш мероприяти – пуриншĕн те чăн-чăн пысăк савăнăç.

Шăпах çак професси представителĕсем – интернатăн коллективĕн тĕп пайĕ. Учреждени ертÿçи Сергей Кузьмин ĕçтешĕсене саламланă май чи малтанах ырлăх-сывлăх суннă, хăрушă чир кăларнă йывăрлăхсене пĕрле пĕтĕçсе çĕнтерме пултарнишĕн тав тунă. Ĕçре уйрăмах лайăх кăтартусемпе палăрнисене тĕрлĕ шайри Хисеп грамотисемпе тата Тав хучĕсемпе чысланă.

Интернат ĕçченĕсем те, кунта сипленекенсем те – спорт тусĕсем, сывă пурнăç йĕркине пăхăнма кăмăллаççĕ. Хальхинче те уяв ăмăртусемсĕр иртмен: дартс енĕпе тата эстафетăра тупăшнă. Уяв тĕлне хатĕрленĕ сценка та пурне те çав тери кăмăла кайнă: унта социаллă тата медицина ĕçченĕсен çăмăл мар ĕç кунне шÿтлĕ майпа сăнласа кăтартнă. Интернатра пурăнакансем те хăйсен сиплевçисене чунтан тухакан юрăпа ăшшăн саламланă.

Ирина ЯКОВЛЕВА.