Манăн мăн асанне, Евге-ния Васильевна Васильева, 1915 çулта Мăн Явăшра хресчен çемйинче çуралнă.

Çемье пысăк пулнă: тăватă хĕр, икĕ ывăл çитĕннĕ. Мăн асанне 4 класс пĕтернĕ.

Вăрçă пуçлансан ашшĕне фронта илнĕ. Мăн асанне çемьере асли пулнă. 1941 çулхи октябрьте ăна та ыттисемпе пĕрле Сăр хĕрне хÿтĕлев чиккине çĕклеме илсе кайнă. Çĕр ĕçĕ нихăçан та çăмăл пулман. Кунта вара шартлама сивĕре вăй хума тивнĕ. Çипуçĕ та йĕркеллĕ мар. Пичĕсене шăнтас мар тесе хур е сысна çăвĕпе сĕрнĕ иккен...

Евгения Васильевнан асаилĕвне 2001 çулта вырăнти шкулти истори учителĕ Зоя Казакова çырса илнĕ. Унта мăн асанне вăрçă тухнă чух хăй 25-ре пулнине, 1941 çулхи хĕлле 40–45 градус сивĕ тăнине, окоп чавнă çĕрте ытларах хĕрарăмсем тата çар çулне çитмен арçын ачасем ĕçленине, хăшпĕр ачасем кунта амăшĕсемшĕн тăрăшнине пĕлтернĕ.

Вăрçă хыççăн Евгения Васильевна качча тухнă, анчах ир тăлăха юлнă. Мăшăрĕ, вăрçă участникĕ, 1951 çулта сурансене пула çĕре кĕнĕ. Мăн асанне виçĕ ачине пĕчченех çĕкленĕ. Ĕмĕр тăршшĕпе Ульянов ячĕллĕ колхозра вăй хунă, уй-хир бригадин звеньевойĕ пулнă. Тĕрлĕ наградăсене тивĕçнĕ. Социализмла ĕç ударникĕ.

Карина Васильева.