Пирĕн хушăра шанса панă ĕçе чун-чĕререн парăннă çынсем чылай. Вĕсемшĕн професси пурнăç тĕллевĕ пулса тăнă. Пандеми сарăлнă тапхăрта сыв-лăх чи хаклă пуянлăх пулнине кашниех çирĕппĕн ăнланса илчĕ темелле. Медицина ĕçченĕсем уйрăмах ыр сăмахсене тивĕçлĕ. Коронавируспа тата ытти чир-чĕрпе кунĕн-çĕрĕн кĕрешеççĕ.

Сĕм çĕрле-и, ир-ирех-и – пациент патне васкаççĕ. Больницăсенче те çынсене кунĕн-çĕрĕн сиплеççĕ. Йывăр лару-тăрăва лекнисене иккĕмĕш пурнăç та парнелеççĕ. Çынсен сывлăхĕшĕн тăрăшасси – пархатарлă та сăваплă ĕç.

Шăхальти фельдшерпа акушер пунктĕнче тимлекен Анна Гурьевна Сергеева ял-йышра хисепре. Вăл хăйĕн тивĕçне яланах тÿрĕ кăмăлпа пурнăçланăшăн ят-сум çĕнсе илнĕ. Анна Гурьевна виçĕ ял – Шăхаль, Çĕньял Нурăс, Мачамăш – çыннисен сывлăхне пăхса-асăрхаса тăрать. Хăшпĕр тăрăхсем çывăхра мар пулин те хастар фельдшер йывăрлăхран хăрамасть. Чирлĕ çын патне хăвăртрах çитес тесе велосипедпа çула тухать.

– Анна Гурьевна пек маттур çынсем пулсан малалла та пурăнас килет. Эмелпе кăна мар, ăшă, çепĕç сăмахсем каласа сиплеме пĕлет, – терĕ Çĕньял Нурăсри   пĕр кинеми.

Этем ĕмĕрне 100 çулпа виçеççĕ. Пурнăç сукмакне малалла такăрлатакансем те пур. Анна Сергеева çамрăксем анчах мар, ватăсем те çирĕп сывлăхлă пулччăр тесе тăрăшать. Календаре кĕртнĕ вакцинацие вăхăтра ирттересси çине пысăк тимлĕх уйăрать. Прививка пирки куçа-куçăн тĕл пулсан та, телефонпа шăнкăравласа та асилтерет.

Ял çыннисемшĕн фельдшер тухтăр вырăнĕнчех ĕнтĕ. Анна Гурьевна анлă тавракурăмлă, аслă категориллĕ специалист. Квалификацие ÿстерсех тăрать.

– Анна Гурьевнăна эпĕ питĕ хисеплетĕп. Вăл хăйĕн ĕçне питĕ лайăх пĕлет. Маншăн вăл чăн-чăн тухтăр, – палăртрĕ Шăхальти Варвара Борисова. – Медицина ĕçченĕ çывăхра пурри чăн телей. Паха сĕнÿ-канаш парать. Чирлессĕн сиплет. Участокри врач хушнипе уколне те тăвать, система та лартать. Пурнăç илемне туйса пурăнма вăй-хăват хушать.

Чи пысăк хаклав – çынсен ырă сăмахĕ. Ахальтен мар «ырă ят ылтăнран та хаклă» тесе калаççĕ. Фельдшер ĕçтешĕсен хисепне те тивĕçнĕ.

Вăл профессие чун туртнипе суйланă. Ача чухнех медицина ĕçченĕ пулас ĕмĕтпе çунатланнă. Анна Гурьевна Патăрьел тăрăхĕнче йышлă çемьере çуралса ÿснĕ. Вунă класс пĕтернĕ хыççăн 1990 çулта Киров облаçĕнчи Яранскри медучилищĕне вĕренме кĕнĕ. Тепĕр виçĕ çултан алла диплом илнĕ, юратнă ĕçре тăрăшма пуçланă. Анна Сергеева Патăрьелĕнчи, Шупашкарти сиплев учрежденийĕсенче те вăй хунă.

Шăпа ĕçчен те сăпайлă пикене Вăрнар тăрăхне те илсе çитернĕ. Юлташ хĕрĕн туйĕнче Шăхаль ялĕн яш каччипе паллашнă. Пĕр-пĕрне савакансем кĕçех çемье чăмăртанă. Юрий Николаевичпа Анна Гурьевна ывăлпа хĕре çут тĕнче парнеленĕ. Улми йывăççинчен аякра ÿкмест. Ачисем пурнăç çулĕпе çирĕппĕн утаççĕ. Анастасия икĕ аслă пĕлÿ илнĕ. Хальхи вăхăтра Шупашкарти организацире инженер-экологра тăрăшать. Канмалли кунсенче ашшĕ-амăшĕ патне пулăшма васкать. Иван служба хыççăн контракт йĕркипе çартах юлнă. Куçăмсăр майпа юридици факультетĕнче ăс пухать.

Анна Сергеева сывлăх сыхлавĕнче 28 çул тимлет. 2000 çултанпа Шăхальти ФАП-ра вăй хурать. Наци проектне пурнăçа кĕртсе ялта çĕнĕ медпункт хута янăранпа кăçалхи утă уйăхĕнче шăпах та ултă çул çитет. Кунта ĕçлеме мĕнпур услови пур.

– Мана пурнăç пархатар кÿчĕ. Хам юратнă ĕçре тăрăшатăп. Çынсен сывлăхĕшĕн яваплăха туятăп. Пациентсем сывалнине курсан питĕ хĕпĕртетĕп, – çирĕплетрĕ Анна Гурьевна.

Фельдшер ĕçре те, çемьере те телей тупнă. Анна Сергеева ир-ирех ура çинче. Кил-тĕрĕшри ĕçсене пуçтарсан медпункт еннелле куллен çул такăрлатать. Чирлĕ çын чĕнсен ĕç вăхăчĕ çитичченех ăна медицина пулăшăвĕпе тивĕçтерме васкать. Гиппократ тупине яланах асра тытать.

Елена ПОРФИРЬЕВА.