Наркомание тата наркотиксен саккунсăр çаврăнăшне хирĕç тăмалли пĕтĕм тĕнчери кун йĕркипе районта республика семинарĕ иртнĕ.

Унăн тĕп тĕллевĕ – çак сиенлĕ япаласенчен асăрханассине вăйлатасси тата ку енĕпе çынсен саккун пĕлĕвне ÿстересси. Мероприятие Чăваш Республикин Наркотике хирĕçле комиссийĕ, район администрацийĕ, Чăваш енри Шалти ĕçсен тата Сывлăх сыхлавĕн министерствисем, «Чувашия» фонд пĕрле пуçарса йĕркеленĕ.

Семинара полицин «Вурнарский» пайĕн, район прокуратурин представителĕсем, ял-хула поселенийĕсен пуçлăхĕсем, ыттисем те хутшăннă.

Райадминистраци пуçлăхĕ Андрей Тихонов мĕнпур профилактика субъекчĕсен чи малтанхи тĕп задачи çамрăксене наркотиксенчен çăлса хăварасси тесе палăртнă, ку тĕллеве пурнăçлама профилактика ĕçне анлăлатма, унта пĕтĕм общественноçе хутшăнтарма сĕннĕ. Чăваш Республикин Наркотике хирĕçле комиссийĕн аппарачĕн ертÿçи Ирина Лисенкова Чăваш енре наркотиксен саккунсăр çаврăнăшне хирĕç тăрассипе ирттерекен ĕç-хĕлпе паллаштарнă. Чăваш ен ШĔМ-ĕн, «Мотивация» пропаганда центрĕн представителĕсем Ольга Якунина тата Алексей Афанасьев çамрăксене сиенлĕ япаласенчен хÿтĕлемелли профилактика меслечĕсем пирки сăмах хускатнă.

Семинар участникĕсем Вăрнарти 2-мĕш шкулта педагогсемпе, педагог-психологсемпе тренинг евĕр вĕренÿсем те ирттернĕ. Теми – çула çитменнисем хушшинче социаллă-сиенлĕ пулăмсене сиресси.

Хамăр инф.