Вăл-ку отрасльте мероприятисем йĕркелени мал опытпа, ыттисен ÿсĕм-çитĕнĕвĕпе паллаштарать. Акă, Чăваш Республикин Ял хуçалăхĕн ăслăлăхпа тĕпчев институчĕн базинче, Çĕрпÿ тăрăхĕнчи Михайловка ялĕ çывăхĕнче, иртнĕ Уй кунне çĕршыври 15 регионтан 50 компани хутшăннă.

Палăртмалла, çак организацисем ял хуçалăх культурисен çĕнĕ сорчĕсемпе, гибридсемпе, ÿсентăрана хÿтĕлекен хатĕрсемпе, 130 ытла техникăпа тата оборудованипе паллаштарнă. Уй-хир карапĕсене вырмана хатĕрлес тĕлĕшпе ăсталăх класĕ те иртнĕ.

Мероприятире Чăваш ен Пуçлăхĕ Олег Николаев, Министрсен Кабинечĕн Председателĕн заместителĕ – ял хуçалăх министрĕ Сергей Артамонов тата ытти ятлă-сумлă çынсем пулнă. Сергей Геннадьевич кăçал аграрисем уйрăмах ял хуçалăх техникине хапăлласа туяннине палăртнă. Субсиди тата 250 миллион тенкĕ уйăрнăран хастар утăм тăвакансен йышĕ ÿссех пырать.

Уй кунне пирĕн ентешсем те хутшăннă. Вĕсен йышĕнче – «Вăрнарти аш-какай комбиначĕ» агрохолдингăн, «Санары», «Агрохмель» агрофирмăсен, Карл Маркс ячĕллĕ, «Янгорчино», «Луч» кооперативсен ертÿçисемпе специалисчĕсем, Валентин Павлов, Александрпа Виталий Яковлев фермерсем тата ыттисем.  

Тăрăшуллисем хисепре. Ял хуçалăхĕнчи кăтартуллă тата нумай çулхи ĕçшĕн «Агрохмель» агрофирма директорĕн заместительне Борис Семенова «Чăваш Республикин ял хуçалăхĕн тава тивĕçлĕ ĕçченĕ» хисеплĕ ят панă. Ăна çав ятпа савăнăçлă лару-тăрура саламланă.