Депутатсен район Пухăвĕн депутачĕсем Вăрнар ен экономикине çирĕплетес тата аталантарас, халăхăн пурнăç пахалăхне лайăхлатас тĕлĕшпе сахал мар ĕç тăваççĕ. Иртнĕ кĕçнерникун вĕсем черетлĕ ларăва пухăнчĕç. Мероприятие райадминистрацин пуçлăхĕ Андрей Тихонов, структура уйрăмĕсен ертÿçисем, ял тăрăхĕсен пуçлăхĕсем, Вăрнар район прокурорĕн заместителĕ Елена Дмитриева хутшăнчĕç. Ăна депутатсен Пухăвĕн председателĕн заместителĕ Евгений Захаров ертсе пычĕ.

Депутатсен Пухăвĕн ларăвĕ савăнăçлă самантран пуçланчĕ. Ачасене тивĕçлĕ воспитани парас ĕçе пысăк тÿпе хывнăшăн республикăри Амăшĕн   мухтавĕн «Анне» паллипе Уйкас Юнтапари Людмила Ксенофонтовăна чысларĕç. Вăл мăшăрĕпе пилĕк ачана кун çути парнеленĕ. Виççĕшĕ пурнăç çулĕпе çирĕппĕн утаççĕ. Кĕçĕннисем, икĕ хĕр, шкулта пĕлÿ пухаççĕ. Ашшĕпе амăшĕ пек ĕçчен те хастар, икĕ пиччĕшĕпе аппăшĕ пек çивĕч ăслă та правур пулма ĕмĕтленеççĕ.

Тÿрĕ кăмăлпа нумай çул тимлекенсем яланах хисепре пулнă. Райадминистрацин строительство тата коммуналлă хуçалăх пайĕн пуçлăхĕн заместителĕнче тăрăшнă Владимир Леонтьева республика Пуçлăхĕн Тавĕпе наградăларĕç. Агропромышленность комплексне аталантарассине «Санары» агрофирма ĕçченĕ – склад заведующийĕ Елена Петрова – пысăк тÿпе хывать. Маттур хĕрарăма Чăваш Республикин Ял хуçалăх министерствин Хисеп грамотипе чысларĕç.

Районта « Чи лайăх халăх дружинникĕ» конкурса пĕтĕмлетнĕ. Çĕнтерÿçĕ ята, хаçатра çырнăччĕ ĕнтĕ, Анаткас Хапăсра çуралса ÿснĕ, халĕ поселокра пурăнакан Галина Павлова тивĕçнĕ. Ăна район администрацийĕн Хисеп грамотипе чысларĕç.

Пенси Фончĕн районти управленийĕн пуçлăхĕн заместителĕ Людмила Редькова та ырă ят-сума тивĕçрĕ. Ăна юбилей ячĕпе саламларĕç.

Депутатсем ларура пĕлтерĕшлĕ ыйтусене сÿтсе яврĕç. Вĕсенчен пĕри – «Вăрнар районĕн 2021 тата планпа пăхнă 2022–2023 çулсенчи бюджечĕ çинчен» йышăнăва улшăнусем кĕртесси – пулчĕ. Кун пирки финанс уйрăмĕн пуçлăхĕ Гузалия Салахова каласа кăтартрĕ.

Район бюджечĕ субсидипе пуянланнă. Хăшпĕр ĕçсене пурнăçлама укçа-тенкĕ тата кирлĕ. Тĕслĕхрен, ача-пăча сачĕсенче домофон вырнаçтармалла. Пăртасри пĕлÿ çуртĕнче шкул çулĕчченхи уйрăма уçнă май хутса ăшăтмалли системăна та юсамалла иккен, сĕтел-пукан та туянмалла. Çĕрпелти шкулта тата, акă, гараж çĕклесшĕн. Виçĕ культура учрежденине музыка аппаратури кирлĕ. Районта тата ытти пĕлтерĕшлĕ ĕçсене пурнăçламалла. Район бюджетне улшăнусем кĕртме депутатсем пĕр саслăн алă çĕклерĕç.

Район администрацийĕн йĕркелÿ, кадр тата юридици службисен уйрăмĕн пуçлăхĕ Юрий Герасимов тĕрлĕ шайри наградăсене илме тăратнисен списокĕпе паллаштарчĕ. Район Пухăвĕн депутачĕсем кандидатурăсене ырларĕç. Республикăри тÿре-шара та вăрнарсен ĕçĕ-хĕлĕпе кăмăллă юлсан вĕсем патне те тивĕçлĕ наградăсем çитĕç.

Елена ПОРФИРЬЕВА.