Çулла Çĕрпел ял тăрăхне ĕçлĕ тĕлпулăва Чăваш ен вице-премьерĕ Алла Салаева тата культура министрĕ Светлана Каликова килсе çитрĕç. Вырăнти ĕçсемпе паллашнă хыççăн Çĕрпел тăрăхĕнчи халăхăн картина галерейине кĕрсе курма кăмăл турĕç. Унпа паллашнă чухне Алла Салаева картинăсен цифрăлла копийĕсене тăвасси пирки калаçу пуçарчĕ тата çак ĕçе йĕркелеме пулăшрĕ. Чăваш Республикин патшалăх художество музейĕн ĕçченĕсем цифрăлла кописене хатĕрлесе Çĕрпел ял тăрăхĕн администрацине утă уйăхĕнчех çитерчĕç.

Çĕрпел тăрăхĕнчи халăхăн картинăсен галерейи 1980 çулта хăйĕн алăкне уçнă. Вăл пĕтĕмĕшпех Çĕрпел, Хурăнсур Çармăс, Кайри Тукай ялĕсенчи çынсен портречĕсенчен тăрать. Галерейăра 1918–1920 çулсенчи Граждан вăрçине тата 1941–1945 çулсенчи Тăван çĕршывăн Аслă вăрçине хутшăннă çынсен 92 портретне, Çĕрпел тăрăхĕнче ĕçлесе палăрнă çынсен 34 портретне, çавăн пекех 43 картинăра вырăнти ялсем, ял хуçалăх производстви аталаннине курма пулать.

1976 çулхи çуркунне художниксен ушкăнĕ хăйĕн куравне Çĕрпелти ял клубĕнче уçнă. Ун чухне Николай Карачарсков «Янгорчино» хуçалăх ĕçченĕсем пирки те çакăн пек ÿкерчĕксем çырма сĕннĕ. Василий Романов художниксен пуçарулăхне хаваспах йышăннă.

1976 çултан пуçласа 1981 çулччен художниксен ушкăнĕ Çĕрпел тăрăхĕнче пурăнакан çынсен портречĕсене тата ку тăрăхри ял хуçалăх производстви аталаннине ÿкернĕ. Малтанхи кунсенченех «Янгорчино» колхоз художниксене пĕтĕмпех хăйĕн шучĕпе ĕçлеттернĕ. Н. Карачарсков, В.Немцев, П.Григорьев – Савушкин, В.Семенов, Э.Юрьев валли вырăнти выльăх пăхакансен çурчĕ иккĕмĕш кил пулса тăнă, хуçалăх уй-хирĕсем, фермисем вара – вĕсен пултарулăх мастерскойĕ.

Çĕрпел ял тăрăхĕнче ĕçленĕ вăхăтра художниксен ушкăнĕ Чăваш ен ÿнерçисен произведенийĕсенчен 25 курав кăтартнă, 300 ытла ÿкерчĕксене, портретсене, пейзажсене йĕркеленĕ.

Вĕсен пултарулăхĕнче фронтовиксен портречĕсем уйрăм вырăн йышăнаççĕ. Тăван çĕршывăн Аслă вăрçи вăхăтĕнче Çĕрпел ял тăрăхĕнче пурăнакан 513 çынна мобилизациленĕ, вĕсенчен Çĕрпелĕнчен – 232, таврăнман – 89, Хурăнсур Çармăсран – 196, таврăнман – 91, Кайри Тукайран – 85, таврăнман – 45. Кунта пурăнакан 225 çын, килес ăрусен ирĕклĕхĕпе пăхăнманлăхĕшĕн хăйсен пурнăçне панă.

Галерея 2010 çулта Н. Карачарсков тата Çĕрпелти шкулта тимлекен Н.Андреева ÿкернĕ ĕç ветеранĕсен 9 портречĕпе пуянланчĕ.

Галерейăри картинăсен цифрăлла копийĕсемпе интернетри Çĕрпел ял тăрăхĕн сайчтĕнче паллашма пулать.

     Çĕрпел ял тăрăхĕн пуçлăхĕ С.Петров.